नेपालगञ्ज। शुक्रबार राती जाजरकोटमा केन्द्रबिन्दु बनाएर गएको भूकम्पका घाइते भएकोको उपचारका लागि भेरी अस्पताल नेपालगञ्जलाई तयारी अवस्थामा राखिएको छ । बाँकेका प्रमुख जिल्ला अधिकारी श्रवणकुमार पोखरेलले भुकम्पमा परेका गम्भीर घाइतेको उपचारका लागि बाँके प्रशासनले शनिबार बिहान ३ः२१ बजे बाटै तयारी थालेको जानकारी दिए ।

उनले भेरी अस्पताल नेपालगञ्जलाई भुकम्पका विरामीको उपचारको लागि डेडिकेटेड अस्पताल बनाइएको बताए । व्यक्तिगत पहलमा उपचारका लागि आउने घाइतेहरूको आफन्तजनको सहजताको लागि पनि स्वास्थ्यकर्मी नरेश श्रेष्ठलाई फोकलपर्सन तोकिएको उनले बताए ।

प्रजिअ पोखरेलले भेरी अस्पतालमा ८०, सैनिक अस्पताल २० र प्रहरी अस्पतालको ५ बेड गरी १०५ वटा बेड तयारी अवस्थामा राखिएको र बिरामीको चाप र आवश्यकताका अनुसार नेपालगञ्ज मेडिकल कलेज शिक्षण अस्पताल कोहलपुर र नेपालगञ्ज साथै अन्य निजि अस्पतालहरुलाई पनि तयारी अवस्थामा राखिएको जानकारी दिए ।

भुकम्पमा परेर उपचारको लागि नेपालगञ्ज आउने विरामीका लागि नेपालगञ्ज उपमहानगर पालिकाले निशुल्क ५ वटा एम्बुलेन्स तयारी अवस्थामा राखेको उपमहानगरको स्वास्थ्य शाखा प्रमुख रामबहादुर चन्दले जानकारी दिए ।बिरामीको उपचारमा कमी आउन नदिनको लागि पर्याप्त मात्रामा डक्टर, नर्सिङ स्टाफ औषधि उपकरणको प्रबन्ध मिलाइएको प्रजिअ पोखरेलले बताए ।

हेलिकप्टरबाट आउने बिरामीको लागि रांझा विमानस्थल र आर्मीको हेलिप्याडमा २–२ वटा एम्बुलेन्स तैनाथ गरिएको छ । रगतको मौज्दात रहेको र अपुग भएमा फ्रेस रगत आपूर्तिको लागि सशस्त्र प्रहरीको एक टिम तयारी अवस्थामा राखिनुको साथै रक्तदाता सुरक्षाकर्मीको व्यवस्था मिलाइएको छ । यसैबीच भेरी अस्पताल नेपालगञ्जमा भुकम्पका घाइतेहरु उपचारको लागि आउने क्रम सुरु भएको छ । जाजरकोट–३ खलंगाका ४८ वर्षिय बिमलकुमार कार्कीलाई जाजरकोटबाट एम्बुलेन्समा नेपालगञ्ज उपचारको लागि पुराईएको छ ।