बाजुरा। बाजुरामा आगलागीबाट दुई घर जलेर नष्ट भएका छन्। बाजुराको बडीमालिका नगरपालिका –८ रापकमा सोमबार आगलागी हुँदा दुई घर जलेर नष्ट भएको जिल्ला प्रहरी कार्यालय बाजुराले जनाएको छ ।
सोही नगरपालिका- ८ रापकका भरतबहादुर रावल र वीरबहादुर रावलको घरमा विद्युतको तार सट भई आगलागी भएको जिल्ला प्रहरी कार्यालय बाजुराका प्रहरी नायब उपरीक्षक कविन्द्रसिंह बोहराले जानकारी दिए।
आगलागी भएको खबर प्रहरीलाई प्राप्त भएपछि नेपाली सेना, नेपाल प्रहरी र सशस्त्र प्रहरी बल तथा स्थानीयको सक्रियतामा आगो नियन्त्रणमा ल्याएको दुर्गा भञ्जन गुल्मका गुल्मपति सेनानी धर्मेन्द्रबहादुर सिंहले बताए । सेनानी सिंहको नेतृत्वमा आगो नियन्त्रणमा आएको छ । आगो लागेर करिब चार लाख बराबरको क्षति भएको छ। विद्युत्को तार सट भएपछि आगलागी भएको बताइएको छ। आगलागीले लत्ता कपडा, अन्नपात जलेर सखाप भएको सेनानी सिंहले बताए ।
