बैतडी। बैतडीमा जिप र मोटरसाइकल एकआपसमा ठोक्किँएर दुर्घटना भएको छ।
बैतडीको पाटन-पञ्चेश्वर सडकखण्ड अन्तर्गत पाटन नगरपालिका-५ स्याडीखोलमा पाटनबाट मेलौलीतर्फ गइरहेको सामान बोक्ने सु.प.प्र.०२ ००१ च ८४१ नम्बरको जिप र मेलौलीबाट पाटनतर्फ आइरहेको म २प ६९१६ नम्बरको मोटरसाइकल आज (शनिबार) बिहान एकआपसमा ठोक्किएको प्रहरीले जनाएको छ।
जिल्ला प्रहरी कार्यालयका प्रवक्ता प्रहरी निरीक्षक योगेश खत्रीका अनुसार मोटरसाइकल चालक गम्भीर घाइते भएका छन्। मोटर साइकल चालक मेलौली नगरपालिका–६का २१ वर्षीय नरेन्द्र भट्ट गम्भीर घाइते भएका भट्टलाई उपचारका लागि डडेल्धुरा अस्पताल लगिएको छ।
भट्टको दाहिने खुट्टासहित शरीर विभिन्न भागमा चोट लागेको छ । मोटरसाइकलमा पनि क्षति पुगेको प्रहरी निरीक्षक खत्रीले बताए। जिल्ला प्रहरी कार्यालयले जिप चालक अम्बादत्त पन्त र जिपलाई प्रहरीले नियन्त्रणमा लिएको र घटनाका बिषयमा थप अनुसन्धान भइरहेको जनाएको छ।
