बैतडी। मंगलवार राति बैतडीमा जिप दुर्घटना हुँदा दुई जना घाईते भएका छन्। बैतडीको पाटन–पञ्चेश्वर सडक अन्तर्गत पाटन नगरपालिका-६ अड्तोलामा मंगलवार राति ९ः३० बजे जिप दुर्घटना परेको बैतडी प्रहरीले जनाएको छ ।
जिल्ला प्रहरी कार्यालयका प्रवक्ता प्रहरी निरीक्षक योगेश खत्रीका अनुसार डडेल्धुराबाट मेलौली जाँदै गरेको म १ ज ३०१ नम्बरको बोलेरो जिप दुर्घटनामा परेको हो। दुर्घटनामा बैतडीको शिवनाथ गाउँपालिका १ का प्रकाश चाड र उनकी ५ वर्षीया छोरी अनुस्का चाड घाइते भएका छन्।
प्रकाशको टाउको र अनुस्काको हातमा चोट लागेको र उनीहरुको डडेल्धुरा अस्पतालमा उपचार भइरहेको प्रहरी निरीक्षक खत्रीले जानकारी दिए। प्रहरीका अनुसारअनियन्त्रित भएर दुर्घटनामा परेको जिपमा ११ जना सवार रहेका थिए। अन्य यात्रुहरु सकुशल रहेका छन्। जिपका चालक शिवनाथ गाउँपालिका २ का पदमराज कलौनीलाई प्रहरीले नियन्त्रणमा लिएको छ। घटनाका बिषयमा प्रहरीले थप अनुसन्धान गरिरहेको जिल्ला प्रहरी कार्यालय बैतडीले बताएको छ।
