बाजुरा। बाजुराका एकै घरका दुई दाजुभाई एक महिना देखि भारतमा बेपत्ता भएका छन् । बाजुराको खप्तड छेडेदह गाउँपालिका–५, डोगडीका दुई दाजुभाइ भारतबाट नेपाल आउने क्रममा बेपत्ता भएका हुन्।
भारतको उत्तराखण्ड राज्यको पौडीपावौबाट घर फर्किंदै गरेका ४० वर्षीय अर्जुन रावत र ३४ वर्षीय टेकबहादुर रावत विगत एक महिनादेखि बेपत्ता छन् । गत जेठ ३ बाट सम्पर्कविहीन भएको अर्जुनकी श्रीमती जाना रावतले बताए । उनले भने, “बेपत्ता भएका श्रीमान् र देवरले घर आउने दिनमा पावौबाट ऋषिकेश जाने बसमा आउँदै गरेको बताएका थिए ।
सो खबर आएको तीन घण्टापछि दाजुभाइ नै सम्पर्कविहीन भएका थिए ।”बेपत्ता दाजुभाइको खोजी गरिदिनका लागि पीडित परिवारले स्थानीय सरकार, प्रदेश र सङ्घीय सरकारलाई समेत हारगुहार गर्दै आएका छन् । छोराछोरी पढाउन र घर खर्च धान्नकै लागि रावत दाजुभाइ गत मङ्सिरमा कामको खोजीमा भारतको पौडीमा पुगेका थिए थियो । छेडेदह गाउँपालिका उपाध्यक्ष बिसु नाथले बेपत्ता रावत दाजुभाइको खोजी कार्यका लागि विभिन्न निकायसँग पहल भइरहेको बताए ।
