धनगढी : बैतडीका वाशुदेव जोशीको घाँटी रेटेर हत्या गर्ने उनकै गाउँका युवक रहेको खुलेको छ । जिल्लाको दोगडाकेदार गाउँपालिका वडा नम्बर ८ का ३८ वर्षिय वाशुदेव जोशीको हत्यामा सोही गाउँका युवा संलग्न रहेका पाइको जिल्ला प्रहरी कार्यालय बैतडीले जनाएको छ । प्रहरीका अनुसार जोशीकै गाउँका एक जना युवकले बाटोमा घाँटी रेटेर हत्या गरेको हो ।
शनिबार राति करिब ८ बजेतिर धारिलो हतियारले घाँटी रेटेर जोशीको हत्या गरेको खुल्नमा आएको प्रहरीको भनाई छ । प्रहरी श्रोतका अनुसार जोशीको हत्यामा संलग्न ब्यक्तीको पहिचान भइसकेको र खोजिकार्य भइरहेको छ । उनको खोजीका लागी शुरक्षाकर्मी परिचालन गरिएको प्रहरीले बताएको छ । प्रहरीले पहिचान भइसकेको भनेका ति युवकको नाम भने प्रहरीले गोप्य राखेको छ ।
हत्या घटनामा अरुपनि संलग्न हुनसक्ने अनुमान प्रहरीको छ । योजनाबद्ध तरिकाले गरिएको घटनाको सत्यतथ्य छानविन गरि दोषिमाथि कडा कारबाही हुनुपर्ने आफन्तहरुको माग छ । मृतक जोशीको शव अहिले जिल्ला अस्पताल बैतडीमा राखिएको छ । घटनाबारे थप अनुसन्धान भैरहेको जिल्ला प्रहरी कार्यालय बैतडीका प्रवक्ता प्रहरी निरीक्षक योगेश खत्रीले बताए ।
