कञ्चनपुर। कञ्चनपुरमा एक अनाथालयका प्रमुख पक्राउ परेका छन् । जिल्ला प्रहरी कार्यालय कञ्चनपुरका अनुसार महेन्द्रनगरस्थित महाकाली बाल अनाथालयका प्रमुख शंकरबहादुर चन्दलाई बलात्कारआरोपमा पक्राउ गरिएको हो। जिल्ला प्रहरी कार्यालयका प्रवक्ता प्रहरी नायब उपरीक्षक डीएसपी चक्रबहादुर शाहले चन्दलाई मंगलबार बिहान पक्राउ गरिएको जानकारी दिए।
डीएसपी चक्रबहादुर शाहले भने, ‘अनाथालयकै बालिकासँग अनैतिक कुरा गरेको आरोप छ, घटनाको अनुसन्धान भइरहेको छ।’ उनले अनाथालयमा आश्रित १४ वर्षीया र १६ वर्षीया नाबालिकामाथि बलात्कार गरेको अभियोग रहेको बताए । पक्राउ परेका चन्दलाई जिल्ला प्रहरी कार्यालयको हिरासतमा राखेर अनुसन्धान भइरहेको प्रहरी प्रवक्ता प्रहरी नायब उपरीक्षक शाहले जानकारी दिए ।
