बैतडी। बैतडीकी २१ वर्षीया माया लुहार हत्या आरोपमा पक्राउ परेका भरतराम कोलीलाई बैतडी पुर्याइएको छ। बैतडीको पञ्चेश्वर गाउँपालिका(४ फ्याउलीकी माया हत्याका आरोपित कोलीलाई बैतडी पुर्याइएको जिल्ला प्रहरी कार्यालय बैतडीले जनाएको छ। आइतबार बिहान कञ्चनपुर हुँदै भारत भाग्ने योजनामा रहेका उनलाई महेन्द्रनगर बसपार्कबाट पक्राउ गरी आइतबार राति नै उनलाई बैतडी पुर्याइएको प्रहरीले जनाएको छ।

घटनाको पाँच दिनपछि उनी पक्राउ परेका हुन्। उनको दायाँ हातमा रहेको घाउको आधारमा प्रहरीले पक्राउ गरेको हो। सोमबार (आज) जिल्ला अदालतबाट म्याद थप गरेर उनीमाथि अनुसन्धान गरिने प्रहरी निरीक्षक लोकराज जोशीले जानकारी दिए। कोलीमाथि कर्तव्य ज्यान मुद्दा दर्ता भइसकेको छ। मायाका परिवारले किटानी जाहेरी दिएकै दिन उनीमाथि कर्तव्य ज्यान मुद्दा दर्ता भएको जनाइएको छ। मायाको केही दिन पहिला भरतले फोन खोसेको र त्यसपछि बोलाएर हत्या गरेको पीडित पक्षको भनाइ छ।

माया र भरतबीच विवाह गर्ने कुरा समेत भइरहेका बेला उसले किन हत्या गर्यो भन्ने विषय अझै खुल्न बाँकी रहेको छ। बैतडी कै शिवनाथ गाउँपालिका–४ का २२ वर्षीय कोली सशस्त्र प्रहरीको हुल तथा दंगा तालिम व्यवस्थापन शिक्षालय पोखरामा कार्यरत थिए। माया गएको चुनावमा म्यादी प्रहरी भएकी थिइन्। गत मंगलबार घरबाट लुगा सिलाउन भनी उनकी भदै १५ वर्षीया नेहा लुहार सँग कुलाउ गएकी माया बुधबार शिवनाथ–६ स्थित शिवनाथ मन्दिर नजिकै घाँटी रेटी हत्या गरेको अवस्थामा फेला परेकी थिइन्। नेहा लुहार भने घाँटीमा धारिलो हतियार प्रयोग गरी घाइते अवस्थामा फेला परेकी थिइन्।घाइते अवस्थामा फेला परेकी उनको डडेल्धुरा अस्पतालमा उपचार भइरहेकोप्रहरीले जनाएको छ ।