बाजुरा। बाजुराको बुढीगंगामा चुनावको मिति अझै अनिश्चित बनेको छ। निर्वाचन आयोगको सिफारिसमा गृह मन्त्रालयले बाजुरामा प्रमुख जिल्ला अधिकारी (सिडिओ), सशस्त्र प्रहरी र नेपाल प्रहरीका प्रमुख परिवर्तन गरेको भएपनी चुनावको मिति अझै अनिश्चित बनेको हो।

बुढीगंगा नगरपालिकामा चुनाव निष्पक्ष र मर्यादित वातावरणमा सम्पन्न गर्न नसकेको भन्दै प्रजिअ र प्रहरी प्रमुखहरूलाई हटाएर नयाँ पठाइएको हो। गृह मन्त्रालयका अनुसार प्रकाशचन्द्र अधिकारीलाई सिडिओको जिम्मेवारी दिइएको छ। सशस्त्र प्रहरी प्रमुखमा गंगादत्त पन्त र नेपाल प्रहरी प्रमुखमा प्रहरी नायब उपरीक्षक सूर्यबहादुर थापालाई जिम्मेवारी दिइएको छ।

उनीहरूले आइतबारदेखि कार्यभार सम्हालेका छन्। निर्वाचन आयोगले बाजुराको बुढीगंगामा निर्वाचन अधिकृतसमेत पठाएको छ। पुष्पराज पाण्डे निर्वाचन अधिकृत तोकिएका छन्। मुख्य निर्वाचन अधिकृत, राजनीतिक दलका प्रतिनिधिहरू लगायतसँग छलफल गरी स्थानीय चुनावको मिति तय गर्ने तयारी गरिएको छ।सिडिओ प्रकाशचन्द्र अधिकारीले निर्वाचनका लागि सुरक्षासम्बन्धी सबै तयारी गरिसकिएको जानकारी दिए। ‘सुरक्षाका हिसाबले हामी तयारीमै छौं,’ अधिकारीले भने, ‘चुनावको मिति तोक्ने काम निर्वाचन अधिकृत कार्यालयले निर्वाचन आयोगको समन्वयमा गर्छ।’चुनावको मिति घोषणा भइनसकेको उनले बताए।

यसअघि बुढीगंगा नगरपालिकामा वैशाख ३० मा स्थानीय चुनाव भए पनि बुथ कब्जा भएको भन्दै विरोध भएको थियो। नेपाली कांग्रेसले नेकपा एमालेका कार्यकर्ताले बुथ कब्जा गरेको आरोप लगाएको छ भने एमालेले सत्ताको दुरूपयोग गर्दै कांग्रेसले कब्जा गरेको आरोप लगाएको छ।कांग्रेसबाट बुढीगंगामा रंगबहादुर खाती र एमालेबाट रामबहादुर बानियाँ मेयर उम्मेदवार थिए। बाजुराको बुढीगंगामा मतदान केन्द्र कब्जा हुँदा सुरक्षाकर्मीहरूले प्रभावकारी भूमिका नखेलेको भन्दै प्रजिअ उपेन्द्रराज पौडेल, सशस्त्र प्रहरी उपरीक्षक दीपक विष्ट र नेपाल प्रहरीका प्रहरी नायब उपरीक्षक चतुर्भुज ओझालाई हटाइएका थिए । ।