डोटी। डोटीको केआईसिंह गाउँपालिकामा जिप माथि रुख खस्दा ३ जना घाइते भएका छन् । डोटीको राजपुरबाट केआईसिंह गाउँपालिकाको सलेना तर्फ गइरहेको सु.प.प्र. ००१ ज. १३२९ नम्बरको जिप माथि रुख खस्दा ३ जना घाइते भएका हुन् ।
जिपमा १३ जना यात्रु सवार रहेका थिए । शुक्रवार साँझ खुटिया दिपायल फास्ट ट्र्याक सडक अन्तरगत केआईसिंह गाउँपालिका ७ चौर स्थित जिप माथि रुख ढलेको प्रहरीले जनाएको छ। प्रदेश ट्राफिक प्रहरी कार्यालय अत्तरियाका अनुसार दुर्घटनामा २२ वर्षीय पदमराज जोशी, २७ वर्षीय भरत खड्का र २९ वर्षीय गाडी चालक कृष्ण बलायर घाइते भएका छन् । घाइतेको शैलेश्वरी अस्पतालमा उपचार भइरहेको छ।
घाइतेहरूको श्री भैरव प्रसाद गण सुल्लेक सुरक्षा बेसबाट खटिएको टोली र इलाका प्रहरी कार्यालय राजपुरको संयुक्त टोलीले उद्धार गरेका हुन् । जिपमा सवार अन्यको अवस्था सामान्य रहेको छ । जिपको हुट र वाइपर ग्लासमा क्षति पुगेको प्रहरीले जनाएको छ।
