धनगढी। नेकपा (एकीकृत समाजवादी) पार्टीबाट सुदूरपश्चिम प्रदेशको तत्कालीन आर्थिक मामिलामन्त्री रहेका तारा लामा तामाङले मन्त्रिपरिषद् हेरफेरमा असन्तुष्टि जनाएका छन् ।
मन्त्रिपरिषद् हेरफेर गर्दा गठबन्धनमा आवद्ध नेपाली कांग्रेसले समेत आफूले जिम्मेवारी सम्हालिरहेको मन्त्रालय मागेको अवस्थामा जानकारी समेत नदिएर विनाकारण पदबाट हटाइएको भन्दै उनले असन्तुष्टि जनाएका छन् । आइतबार सामाजिक सञ्जाल फेसबुुकमा, ‘सुदूरपश्चिम प्रदेश सरकारको मन्त्रिमण्डल हेरफेर भयो रे भन्ने सुनियो त !’ भनेर व्यङ्ग्य गरेका तामाङले मन्त्रिपरिषद् हेरफेर गर्दा एकीकृत समाजवादी पार्टीको नेतृत्व र गठबन्धनले कुनै सल्लाह नगरेको दाबी गरे।
‘मलाई जानकारी नदिएरै पदबाट हटाइएको हो । आफैंलाई थाहा छैन मन्त्रीबाट कहाँ राजीनामा गर्नु ? गरेको छैन । मैले बाहिरबाट मात्र सुनेको हो’ तामाङले भने, ‘चुनावका बेला हरेक गतिविधिले पार्टी र गठबन्धनलाई असर गर्छ नेतृत्वले सरसल्लाह गर्नुपर्थ्यो भन्ने हो ।’ सरकारमा सहभागी गराइएको नेपाली कांग्रेसले पनि आफ्नो मन्त्रालय नमागेको अवस्थामा आफूमाथि अन्याय भएको उनको गुनासो छ । ‘गठबन्धनमा दिनै पर्ने भन्ने कुरा भएमा चित्त बुझाउने बाटो हुने थियो तर सबभन्दा ढिलो आएको भनेर कांग्रेसले मेरो मन्त्रालय मागेको पनि छैन’ उनले भने ।
मन्त्री पद स्थायी नहुने भएकाले कुनै न कुनै दिन जाने कुरा सामान्य नागरिकलाई समेत थाहा भएको बताउँदै उनले आपसी छलफल र सरसल्लाहविना हटाइनु गलत भएको बताए । एकीकृत समाजवादी पार्टीले भने मन्त्री पदबाट फिर्ता बोलाइएकाहरूले राखेको असन्तुष्टिको कुनै अर्थ नहुने बताउने गरेको छ । सरकारमा पठाउने बेला नै जुनसुकै बेला त्याग गर्नुपर्ने भनेर पठाइएकाले अहिले आएर असन्तुष्टि व्यक्त गर्न नहुने उसको भनाइ छ । सुदूरपश्चिम प्रदेश सरकारमा कांग्रेसलाई पनि सहभागी गराउन केही दिनअघि मात्र मुख्यमन्त्री त्रिलोचन भट्टले मन्त्रिपरिषद् हेरफेर गरेका थिए । सो क्रममा एकीकृत समाजवादीकातर्फबाट भौतिक पूर्वाधार विकासमन्त्री रहेका दीर्घ सोडारी बाहेकका दुई जनामन्त्री र तीन राज्यमन्त्री फिर्ता भएका थिए । उनीहरूको ठाउँमा नेपाली कांग्रेसले दुई मन्त्री र एक राज्यमन्त्री तथा एकीकृत समाजवादीबाट एक मन्त्री र दुई राज्य मन्त्री थपिएका थिए ।
