बैतडी। बैतडीको सिगासमा कर्तव्य ज्यान मुद्दाको आरोपमा एकजना पक्राउ परेका छन्। बैतडीको सिगास गाउँपालिका ७ का ३० बर्षीय रमेशसिंह ऐरलाई पक्राउ गरेको बैतडी प्रहरीले जनाएको छ।
सिगास गाउँपालिका ८ का ५५ बर्षीय कटक बोहराको हत्यामा संलग्न रहेको आरोपमा ऐरलाई पक्राउ गरिएको इलाका प्रहरी कार्यालय पाटनका प्रमुख प्रहरी निरीक्षक राजेश शाहीले जानकारी दिए। गएको मंसिर १३ गते राती कालपोखरी मन्दिरको जात्रामा गएका कटक बोहरा मंसिर १४ गते मृत फेला परेका थिए।
त्यसपछि प्रहरीले घटनाको अनुसन्धान थालेको थियो। मृतक बोहराको शरीरमा घाउचोट देखिएकाले उनको हत्या भएको हुन सक्ने भन्दै आफन्तजनले प्रहरीमा निवेदन दिएका थिए। सोही बेलादेखि प्रहरीले सो घटनाको अनुसन्धान गरिरहेको र घटनामा संलग्न भएको आरोपमा ऐरलाई सोमबार साँझ पक्राउ गरिएको प्रहरी निरीक्षक शाहीले बताए।
उनले भने ‘घटना भएको भोलीपल्टदेखि रमेशसिंह ऐर फरार रहेकाले हामीले आशंका गरेर अनुसन्धान अगाडि बढाएका थियौं। अनुसन्धान गर्दै जाँदा कटक बोहराको हत्यामा उनको संलग्नता हुन सक्ने हामीले शंका गरेका छौं। अहिले अनुसन्धानका लागि हिरासतमा राखेका छौं ।’पक्राउ परेका ऐरले मंसिर १३ गते राती कटक बोहरासंग विवाद भएको र सो बेला कुटपीट गरेको प्रहरी समक्ष स्वीकार गरेका छन् । पक्राउ परेकामा ऐर माथि थप अनुसन्धान भईरहेको प्रहरीले जनाएको छ ।
