बैतडी। बैतडीमा सोमबार साँझ जिप दुर्घटनामा एक नवविवाहित जोडीसहित चार जनाको मृत्यु भएको छ।
जिल्लाको पाटन बजारबाट पाटन नगरपालिका ७ कैलपाल जाँदै गरेको से १ ज ८८८ नम्बरको जिप पाटन नगरपालिका १ सकार थाल खोलामा दुर्घटनामा परेको हो । जीप दुर्घटना हुँदा ४ जनाको मृत्यु भएको छ भने ६ जना घाइते भएको इलाका प्रहरी कार्यलय पाटनका प्रहरी निरीक्षक राजेश शाहीले जानकारी दिए ।
दुर्घटनामा परेर ज्यान गुमाउनेमा पाटन ७ कैलपाल माइत भएकी २० बर्षीया मनिषा विक र उनका श्रीमान २४ बर्षीय प्रेम चुनारा, पाटन नगरपालिका १ सकारका १३ बर्षीय विनोद भट्टराई र सोही ठाउँकी ७२ बर्षीया रमा भट्टराईको रहेका छन्।
मृतक नवबिवाहित जोडी घरबाट माइती फर्कदै गरेको प्रहरीले जनाएको छ। घाइते ६ जनाको अवस्था सामान्य रहेको उनिहरुको प्राथमिक स्वास्थ्य केन्द्र केन्द्र पाटनमा उपचार भइरहेको प्रहरी निरीक्षक शाहीले बताए । प्रहरीका अनुसार जीपमा चालक सहित ११ जना सवार थिए । घटनाको कारण खुलेको छैन् । चालक फरार छन् ।
