सल्यान। आइतबार बिहान सल्यानमा भएको बस दुर्घटनामा परी मृत्यु हुनेको संख्या ९ जना पुगेको छ । सल्यानको जयपानीबाट दाङको तुल्सीपुरतर्फ जाँदै गरेको रा १ ख २५५२ नम्बरको बस कपुरकोट गाउँपालिका–५ खारखोलामा बिहान पौने ११ बजेतिर दुर्घटना भएको हो ।
दुर्घटनामा परी नौ जनाको घटनास्थलमै मृत्यु भएको कर्णाली प्रदेश प्रहरी कार्यालयका प्रहरी उपरीक्षक तथा प्रवक्ता माधवप्रसाद श्रेष्ठले जानकारी दिए । उनका अनुसार बसमा सवार चालक सहित ३१ जना रहेका छन् । ९ जना बाहेक अन्य सबै घाइते रहेको उनले बताए । घाइतेहरुको उद्धार गरेर सल्यानको श्रीनगरमा रहेको अस्पतालमा उपचार भइरहेको छ । प्रहरीका अनुसार बस धेरै स्पिड र जीर्ण सडकका कारण दुर्घटनामा परेको हो। बस सडकबाट २ सय मिटर तल खसेको र बस चालक अझै फरार रहेको बताइएको छ। चालकको खोजी कार्य जारी रहेको प्रदेश प्रहरी कार्यालयले जनाएको छ। बसमा सवारहरू अधिकांश भाइटीका सकेर फर्किएकाहरू रहेको बताइएको छ ।
