बैतडी। बैतडीको कठपातेमा स्कारपियो दुर्घटना भएको छ । बैतडीको दशरथचन्द नगरपालिका २ कठपाते नजिकै ८ जना सवार रहेको स्कारपियो दुर्घटनामा परेको हो।
गोठलापानीबाट मेलौली तर्फ गईरहेको म १ च ६२३ नम्बरको स्कारपियो आइतबार साँझ ५ बजेतिर दुर्घटनामा परेको जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले जानकारी दिए।स्कारपियो चालक शिवनाथ २ का २२ बर्षीय मीनराज ओझाले मदिरा सेवन गरेर स्कारपियो चलाएकाले दुर्घटना भएको प्रहरीले जनाएको छ।
स्कारपियो नालीमा खसेकाले मानवीय क्षति हुन नपाएको प्रहरी निरीक्षक ओझाले जानकारी दिएका छन्। चालकलाई अहिले प्रहरी नियन्त्रणमा राखिएको छ। दुर्घटना भएपछि स्थानीयहरुले प्रहरीलाई खबर गरेका थिए । चालकले मदिरा सेवन गरेको पाइएकाले चालकलाई नियन्त्रणमा राखिएको बताइएको छ ।
