बैतडी। बैतडीको पाटन – पञ्चेश्वर सडक खण्ड अवरुद्ध भएको छ । अविरल वर्षाका कारण पहिरो खस्दा उक्त सडक खण्ड अवरुद्ध भएको हो । सडकखण्डको पाटन नगरपालिका–६ चानपुरमा सोमबार राति सडक माथिबाट पहिरो खसेको थियो।
सडक अवरुद्ध हुँदा तल्लो स्वराडबाट सदरमुकाम, डडेल्धुरा, धनगढी, महेन्द्रनगरका लागि छुटेका तथा तल्लोस्वराड भित्रिने सवारी साधन बीच बाटोमै रोकिएका छन्। यसका साथै आकस्मिक उपचारका लागि अस्पताल जान लागेका बिरामी र अन्य यात्रु पनि बीच बाटोमै अलपत्र परेका छन् ।
अवरुद्ध सडक सञ्चालनका लागि पहल भइरहेपनि ठूलो पहिरो खसेकाले समस्या भएको इलाका प्रहरी कार्यालय पाटनका निमित्त प्रमुख रामदत्त भट्टले जानकारी दिए । उनले भने, ‘पहिरो पन्छाउन जेसिबी लगाएका छौं, पहिरो ठूलो छ, सडक सुचारु गर्न केही समय लाग्छ ।’
