दार्चुला। दार्चुलामा बालिकामाथि यौन दुर्व्यवहार गरेको आरोपमा एक युवकलाई पक्राउ गरेको छ। भदौ १५ गते राति मार्मा गाउँपालिका ६ पत्थरकाँडामा गौरा पर्व हेरेर घर फर्किने क्रममा बालिकामाथि यौन दुर्व्यवहार गरेको आरोपमा एक जनालाई प्रहरीले पक्राउ गरेको हो।
पक्राउ पर्नेमा नौगाड गाउँपालिका-४ सिप्टीका २५ वर्षीय महेशसिंह ठगुन्ना रहेको जिल्ला प्रहरी कार्यालय दार्चुलाले जनाएको छ । जिल्ला प्रहरी कार्यालय दार्चुलाका सूचना अधिकारी एवं प्रहरी निरीक्षक नरेन्द्र बहादुर चन्दले पीडित बालिकाका आफन्तले दिएको जाहेरीका आधारमा उनलाई बिहीबार पक्राउ गरेर अनुसन्धान थालिएको जानकारी दिए ।
बालिकाले आफुमाथि यौन दुव्र्यवहार गरेको भन्दै बुधबार जिल्ला प्रहरी कार्यालयमा उजुरी दिएपछि प्रहरीले आरोपितलाई बिहीबार पक्राउ गरेको हो। स्थानीय बालिकामाथि पत्थरकाँडामा गौरा पर्व हेरेर राति साढे ११ बजे घर फर्किने क्रममा ठगुन्नाले दुर्व्यवहार गर्न खोजेको आरोप छ। जाहेरीका आधारमा बाल यौन दुरुपयोगअन्तर्ग मुद्दा दर्ता गरेर अनुसन्धान थालिएको र पीडित बालिकाको बिहीबार जिल्ला अस्पताल दार्चुलामा स्वास्थ्य परिक्षण गरिएको प्रहरीले जनाएको छ।
