बैतडी। बैतडीमा १ लाख बढीको म्याद नाघेका सामाग्री बरामद गरिएका छन् । बैतडीमा संयुक्त बजार अनुगमन टोलीले पछिल्लो एक हप्तामा सञ्चालन गरिएको बजार अनुगमनका क्रममा एक लाख बढीको म्याद गुज्रेको सामग्री बरामद गरिएको हो ।
जिल्ला प्रशासन कार्यालयका सूचना अधिकारी खगेन्द्र भारतीका अनुसार बजार अनुगमन गर्दा जिल्लाको सतबाँझ, पाटन, मुस्याचोर, देहीमाण्डौं लगायतका क्षेत्रमा उक्त मुल्यका सामाग्री बरामद गरिएका हुन् । बजार अनुगमनका क्रममा धेरै जसो पसलमा खाद्यान्न सामग्री समेत म्याद नाघेका पाइएका भारतीले जानकारी दिए । यस्तै अनुगमनका क्रममा कतिपय पसलहरु सम्बन्धित निकायमा दर्ता नभएका पसलहरुलाई सम्बन्धित निकायमा दर्ता गर्न समेत अनुगमन टोलीले सुझाएको छ ।
सूचना अधिकारी भारतीले भने ‘अहिले सम्म हामीले एक सय बढी पसलमा अनुगमनका क्रममा म्याद नाघेका सामग्री बरामद गरेका छौं । पेय पदार्थ, कस्मेटिक सामग्रीहरु समेत म्याद नाघेका फेला परेका छन् ।’ शनिबार जिल्लाको पाटनमा बजार अनुगमन गरिएको छ । अनुगमनका क्रममा विभिन्न पसलहरुबाट म्याद नाघेका सामग्री बरामद गरिएकोले नष्ट गरिने बताइएको छ । जिल्ला प्रशासन कार्यालयको समन्वयमा गरिएको बजार अनुगमनमा खाद्य प्रविधि तथा गुण नियन्त्रण कार्यालय, घरेलु तथा साना विकास समिति, स्वास्थ्य कार्यालय, स्थानीय तहका प्रतिनिधिहरुको समेत सहभागिता रहने गरेको छ ।
