नेकपा एमाले निकट राष्ट्रिय युवा संघमा उपाध्यक्ष तथा प्रवास विभाग प्रमुख योगेश साउद माओवादी केन्द्रमै फर्किएका छन् ।
नेकपा विभाजन हुँदा लेखराज भट्टसँगै एमालेमा गएर युवासंघमा उपाध्यक्षको जिम्मेवारी पाएका साउद बुधबार माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेट्दै नेकपा एमाले परित्याग गरेको घोषणा गरेका हुन्। उनलाई प्रचण्डले माओवादी केन्द्रमा स्वागत गरे।
एमालेभित्र लोकतान्त्रिक अभ्यास र राजनीतिक चरित्र नभएकोले त्यहाँ बस्न नसक्ने अवस्था सिर्जना भएर पुनः माओवादी केन्द्रमा फर्केको साउदले बताएका छन्।
साउदसहित युवा संघका सुदूरपश्चिम प्रदेशका २६ जना केन्द्री सदस्य माओवादीमा फर्किएको प्रचण्डको निजी सचिवालयले दावी गरेको छ।
साउद २०५७ सालदेखि माओवादी आन्दोलनमा लागेका थिए। उनी माओवादीको तत्कालीन जनमुक्ति सेनाका सदस्य समेत हुन्।
