बैतडी। बैतडीमा भालुको आक्रमणबाट एकजना घाइते भएका छन् । जिल्ला प्रहरी कार्यालय बैतडीका अन्ुसार बैतडीको पञ्चेश्वर गाउँपालिका ५ रन्तोलीका ६२ बर्षीय उजीतराम कोलीलाई सोमबार बिहान भालुले आक्रमण गरेको हो । घर नजिकैको खेतमा पानी लगाउने क्रममा कोलीलाई भालुले आक्रमण गरेको जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले जानकारी दिए।
भालुको आक्रमणबाट घाइते कोलीको टाउको गम्भीर चोट लागेको बताइएको छ । घाइते कोलीको जिल्ला अस्पताल बैतडीमा उपचार भईरहेको प्रहरीले जनाएको छ । यसअघि आइतबार मात्रै जंगली बँदेलको आक्रमणमा परी बैतडीको सुर्नया ४ का राम लुहार घाइते भएका थिए । आफ्नो बारीमा कामका लागि जाने बेला लुहारलाई बँदेलले आक्रमण गरेको थियो ।
