बाजुरा। बाजुरामा पहिरोले बुढीगंगा नदी थुनिएको छ । बाजुरा जिल्लाको गौमूल गाउँपालिका २ स्थित बुढीगंगा नदी पहिरोले थुनिएको हो । हिमाली भेगमा भारी बर्षा भइरहेकाले आजविहानबाट फेरी पहिरो गई नदी थुनिएको गौमुल गाउँपालिकाका अध्यक्ष हरी बहादुर रोकायाले जानकारी दिए। उनले भने,‘ हिजोदेखि नदीमाथि खसेको पहिरोले नदी थुनिने खुल्ने क्रम भइरहेको छ । अहिले पनि पहिरोले नदी थुनिएको छ । एकैचोटी नदी फुटे ठूलो क्षति हुने उनको भनाई छ ।
उनका अनुसार हिजो थुनिएको नदी विस्तारै खुलेकाले क्षति हुन पाएन । नदी आसपासका स्थानीयलाई सुरक्षित स्थानमा सारिएको उनले बताए । सुरक्षाकर्मी गाउँपालिका सहितको टोली उक्त क्षेत्रमा पुगेको छ । आज झनै बढी जोखिम रहेकाले प्रत्येक वडाहरुमा सूचना दिनका लागि एकरएक जना खटाइएको छ । फेरि थुनिएर पानी निकासा नभए बाजुरादेखि अछामको साँफेबगरसम्मै ठूलो क्षति पुयाउने अध्यक्ष रोकायाले बताए । हाल अजयटोकी बस्तीका २० घर जोखिममा छन् ।यसै बिच जल तथा मौसम विज्ञान विभागले पनि उक्त क्षेत्रको तटीय क्षेत्रहरुमा साँझ सम्मै उच्च सतर्कता अपनाउन आग्रह गरेको छ ।
