धनगढी । कैलालीको अत्तरियामा रहेको दुग्ध विकास संस्थान डीडीसी लाई अत्तरियामै रोकेर अत्तरियामै मिल्क पाउडर प्लान्ट स्थापना गर्न माग गरिएको छ । डीडीसीका लागि अत्तरियामा जग्गा खोज्न बनेको ‘जग्गा प्राप्ति कार्यदल’ र यस क्षेत्रबाट प्रदेशमा निर्वाचित प्रदेश सभा सदस्यहरूले सुदूरपश्चिम प्रदेशका मुख्यमन्त्री कमल बहादुर शाह समक्ष सो माग गरेका हुन ।
उनीहरूले सोमबार मुख्यमन्त्रीलाई ज्ञापन पत्र बुझाउँदै डीडीसीका लागि हाल चाहना महिला सामुदायिक वन उपभोक्ता समूहले सहमति दिएको वन क्षेत्रमा डीडीसीलाई जग्गा प्राप्तिको लागि सम्बन्धित निकायलाई आवश्यक निर्देशन सहित पहल गरिदिन र स्किम मिल्क पाउडर प्लान्ट गोदावरी नगरपालिकामा स्थापना गरिनेछ भन्ने निर्णय गर्न माग गरेका थिए ।
ज्ञापन पत्र बुझ्दै मुख्यमन्त्री शाहले मिल्क पाउडर प्लान्टका लागि आएको बजेट कार्यान्वयन गर्ने विषयमा छलफल भइरहेको बताए । ‘यो योजना हामीले ढिलो ग¥यौ भने फ्रिज जाने सम्भावना बढी देखिएकाले मैले कृषि मन्त्री ज्यू सँग यस विषयमा छलफल गरिरहेको छु’ उनले भने ‘डीडीसीलाई नै जिम्मा दिने कुरा पनि अगाडि बढेको भए पनि कहाँ राख्ने भन्ने विषयमा त्यसका प्राविधिक कुराहरू सल्टाएर अघि बढ्नुपर्ने छ ।’
उनले डीडीसीको हाता भित्र जग्गा रहेको विषयमा भने आफूलाई जानकारी नभएकाले यसका बारेमा बुझेर कसरी अगाडि बढाउन सकिन्छ भन्ने विषयमा छलफल गर्ने बताए । उनले अहिले डीडीसी स्थापनाका लागि कृषि मन्त्रीले कहाँ कहाँ छलफल गरेका छन् भन्ने बारेमा आफूलाई जानकारी नभएकाले बताए ।
ज्ञापन पत्र बुझाउन कार्यदलका संयोजन गोपाल दत्त भट्ट सँगै यस अर्थ राज्य मन्त्री प्रकाश बम, प्रदेश सभा सदस्य तुलसी देवकोटा, खेमादेवी विष्ट, जानकी कुँवर पौडेल लगायत कार्यदलका सदस्य लोकराज पाण्डे ९आगो०, भीम बिक लगायतको सहभागिता रहेको थियो ।
संघीय सरकारले चालु आर्थिक वर्षमा प्रदेश मार्फत मिल्क पाउडर प्लान्ट सञ्चालनमा ल्याउन १२ करोड बजेट विनियोजन गरिएको छ । तर, हालसम्म मिल्क पाउडर कुन मोडालिटीमा कहाँ सञ्चालन गर्ने भन्ने बारेमा भने टुङ्गो नलागेको भूमि व्यवस्था, कृषि तथा सहकारी मन्त्रालयका सूचना अधिकारी टिकेन्द्र कुश्मीले बताए । उनले मिल्क पाउडर प्लान्टका लागि ४० करोडको योजना अघि सारिएको भएपनि चालु आर्थिक वर्षमा १२ करोड बजेट विनियोजन गरिएको बताए ।
