धनगढी : नेकपा एमाले कैलाली जिल्ला कमिटिले शक्ति प्रदर्शन गर्ने तयारी गरेको छ । पार्टीले सुदुरपश्चिम प्रदेशभरी एकै पटक शक्ती प्रदर्शन गर्ने तयारी गरे अनुसार कैलालीमा बृहत मोटरसाइकल र्याली निकालिने जनाइएको छ । संघीय लोकतान्त्रिक गणतन्त्रका पक्षमा भोलि गोदावरी देखी धनगढी सम्म मोटरसाइकल र्याली निकालिने पार्टी कैलाली जिल्ला कमिटि अध्यक्ष यज्ञराज ढुगांनाले बताए ।
उनका अनुसार कैलालीमा मात्र तीन ठाउँमा मोटरसाइकल र्याली निकाल्ने तयारी छ । अत्तरियादेखि धनगढीसम्म, घोडाघोडी र टीकापुरमा छुट्टाछुट्टै मोटरसाइकल र्याली निकालिनेछ छ । अत्तरियादेखि धनगढीसम्म दिउँसो २ बजे मोटरसाइकल र्याली निकालिने उनले बताए । पहिलो चरणमा सबै जिल्लामा मोटरसाइकल र्याली तथा जागरण भेला गर्न लागेको जनाइएको छ । ढुंगानाले गणतन्त्र विरोधीविरुद्ध भोलि हुने शक्ति प्रर्दशनको तयारी पूरा भएको बताए । उनले गोदावरीदेखि धनगढीसम्म शान्तिपूर्ण मोटरसाइकल र्याली निकाल्ने बताए ।
अध्यक्ष ढुंगानाले भने “भोलिको शक्ति प्रर्दशनको मुख्य उद्देश्य र्याली मार्फत जनतालाई गणतन्त्रको बारेमा सचेतना कार्यक्रम र राजाको अप्रत्यक्ष सहयोगमा जनताको भौतिक सम्पत्ति सहित पत्रकारलाई समेत आगोमा जलाएर जुन विध्वंस मच्चाएका छन्, त्यो जनतालाई स्विकार्य छैन । तसर्थ दरबारीयाहरुलाई आम मानिस गणतन्त्रको पक्षमा रहेको देखाउन र्यालीको आयोजना गरिएको हो” ।
“संविधानमा शान्तिपूर्ण रुपमा आन्दोलन गर्न पाउने अधिकार सुरक्षित हुँदा हुँदै पनि संविधान विरोधी, जुन खालको अशान्ति फैलाउने काम भैरहेको छ, त्यो बिल्कुल बेठीक छ । लोकतन्त्रको विकल्प निरंकुश हुन सक्दैन । त्यसैले सबैलाई लोकतन्त्रको पक्षमा उभिन” समेत उनले अनुरोध गरे ।
