धनगढी । विद्युतीय सवारी साधनको बिक्री वृद्धि भएसँगै धमाधम कैलालीमा इभी चार्जिङ स्टेसन खुल्न थालेका छन् । पूर्व पश्चिम राजमार्ग र भीमदत्त राजमार्गले छोएको अत्तरियामा पनि इभी सवारी साधनको सङ्ख्या बढे सँगै चार्जिङ स्टेसन खुल्ने क्रम बढेको छ । अत्तरिया बसपार्कमा नेपाल विद्युत् प्राधिकरणले इभी चार्जिङ स्टेसन जडान गरेको छ भने अन्य निजी क्षेत्रबाट चार्जिङ स्टेसन सञ्चालनमा आएका छन् । विद्युत् प्राधिकरण बसपार्कमा केही दिन अघि ‘म्यान लेस’ फास्ट चार्जिङ स्टेसन सञ्चालनमा ल्याएको छ । जसमा सबै काम अनलाइनबाट गरिने भएकाले मानिसको आवश्यकता पर्दैन ।

देशभर चार्जिङ स्टेसन नेटवर्क निर्माण गर्ने प्राधिकरणको योजना अन्तर्गत राजमार्ग सँग जोडिएको अत्तरियामा चार्जिङ स्टेसन सञ्चालनमा ल्याइएको हो । चार्जिङ स्टेसनमा १४० किलोवाट क्षमताको चार्जर जडान गरिएको छ । जसमा समान ६० किलोवाटका २ ओटा डिसी चार्जर र २२ किलोवाटको १ एसी चार्जर राखिएको छ ।
विद्युत् प्राधिकरणले निर्माण गरेका चार्जिङ स्टेसनमा राखिएको क्युआर कोड स्क्यान गरी मोबाइल एपबाटै रकम भुक्तानी गर्न सकिन्छ । यस स्टेसनमा चार्जिङ गरेको शुल्क भने समय अनुसार फरक फरक तोकिएको छ । बिहान र बेलुका १० रुपैयाँ ४४ पैसा प्रति युनिट, दिउँसो आठ रुपैयाँ प्रति युनिट राति ११ बजेपछि बिहानसम्म छ रुपैयाँ प्रति युनिट शुल्क तोकिएको छ । अत्तरियामा पछिल्लो समय विद्युतीय हाइसहरु बढी चल्ने गरेका छन् । अत्तरियाबाट पुर्वरोड, महेन्द्रनगर रोडमा चल्ने यस्ता सवारी साधनका लागि विद्युतीय चार्जिङ स्टेसनले सहजता प्रदान गरेको छ ।
नो लाइट अत्तरियाका प्रमुख सुनिल खड्काले यस क्षेत्रमा विद्युतीय सवारी साधनको चापलाई मध्यनजर गरेर चार्जिङ स्टेसन सञ्चालनमा ल्याइएको बताए । उनले यसको सम्पूर्ण काम अनलाइनबाट हुने भएकाले मानिसको आवश्यकता नपर्ने बताए । उनले सिसिटिभी क्यामेराबाटै यसको निगरानी गरिने बताए । कुनै समस्या आएमा भने आफूहरूले मर्मतका लागि सहजीकरण गर्ने गरेको बताए । प्राधिकरणले बसपार्क सँगै जोडिएको दुर्गालक्ष्मी सामुदायिक वनमा क्षेत्रमा चार्जिङ स्टेसन राखेको छ । वनकी अध्यक्ष सिभा कडायतले बसपार्क सँगै जोडिएको खालि ठाउँमा चार्जिङ स्टेसन राख्न नगरपालिका सँगको समन्वयमा जग्गा उपलब्ध गराएको बताइन् ।

अमेरिकी अन्तर्राष्ट्रिय सहयोग नियोग ९युएसआइडी० अन्तर्गतको ऊर्जा नेपाल कार्यक्रमको सहयोगमा अत्तरिया सहित देशभरका ६२ वटा स्थानमा इभी चार्जिङ स्टेसन निर्माण गरिएको छ । युएसआइडी ऊर्जा नेपालको तीन लाख ४६ हजार तीन सय १५ डलर सहयोगमा यात्री डिजाइन स्टुडियो र इस्टप लिमिटेडले चार्जिङ स्टेसन जडान गरेको हो ।

पछिल्लो समय अत्तरियाको पूर्व रोड, पहाड रोडमा निजी क्षेत्रबाट पनि इभी चार्जिङ स्टेसन सञ्चालनमा ल्याइएका छन् । यस क्षेत्रमा होटल, तथा पेट्रोल पम्पले पनि विद्युतीय चार्जिङ स्टेसन सञ्चालनमा ल्याएका छन् । पछिल्लो समय विद्युतीय सवारी साधन बिक्रेता कम्पनी र नेपाल विद्युत् प्राधिकरणले मुलुकका प्रमुख सहर र राजमार्गमा धमाधम चार्जिङ स्टेसन निर्माण गरेका छन् । अतरिया अनलाईन