काठमाडौँ: नेपाल प्रिमियर लिग ९एनपीएल० क्रिकेटमा पोखरा एभेन्जर्सले लुम्बिनी लायन्सलाई १० विकेटले हराएको छ । लुम्बिनीले दिएको १७१ रनको लक्ष्य पोखराले एक विकेट पनि नगुमाई १९ बलअघि नै भेटायो । पोखराका आन्द्रेस गौसले कीर्तिमानी शतक बनाए । एनपीएलमा पहिलो शतक बनाउने क्रममा आन्द्रेसले ५५ बलमा ५ छक्का र १२ चौकाको मद्दतमा १ सय ४ रन जोडे । अमेरिकी ब्याटर आन्द्रेस एनपीएलमा सबैभन्दा कम बलमा अर्धशतक बनाउने खेलाडी पनि बनेका छन् । उनले २० बलमै अधर्शतक बनाए । यस्तै पोखराका दिनेश खरेलले ६१ रन बनाए ।
एनपीएलमा यो पहिलो विकेटका लागि पहिलो शतकीय साझेदारी पनि हो । यस्तै आन्द्रेस र दिनेशबीच एनपीएलकै उच्च रनको साझेदारी भएको छ । यसअघि उद्घाटन खेलमा जनकपुर बोल्ट्सका लाहिरु मिलान्था र हर्ष ठाकरले विराटनगर किङ्ग्ससँगको खेलमा तेस्रो विकेटका लागि नटआउट १ सय १६ रनको साझेदारी गरेका थिए । यस्तै पोखराले पावरप्लेमा ८० रन जोड्दै सर्वाधिक रनको कीर्तिमान पनि बनाएको छ । यसअघि जनकपुर बोल्ट्सले कर्णाली याक्ससँगको खेलमा पावरप्लेमा कुनै विकेट नगुमाई ५६ रन बनाएको थियो ।
यसअघि कीर्तिपुरको त्रिवि क्रिकेट मैदानमा टस जितेर ब्याटिङ गरेको लुम्बिनीले २० ओभरमा ५ विकेट गुमाएर १ सय ७० रन बनायो । लुम्बिनीका कप्तान रोहित पौडेलले ९५ रन बनाए । ५९ बल खेलेका रोहितले ४ छक्का र १० चौका प्रहार गरे । यस्तै टस मूर्सले ४५ रन बनाए । पोखराका विपिन खत्रीले २ विकेट लिए । योसँगै पोखराले प्रतियोगितामा पहिलो जित हात पारेको छ लुम्बिनीले भने लगातार दोस्रो हार बेहोरेको छ ।
