धनगढी : कक्षा १२ सम्म पठनपाठन हुने पाँच वटा विद्यालय रहेको कैलारी गाउँपालिकामा ८.५८ प्रतिशत विद्यार्थीमात्रै माध्यमिक शिक्षा परीक्षा (एसइई) उत्तीर्ण भएका छन् । नौ सामुदायिक विद्यालयबाट एसइई दिएका ५१५ जना विद्यार्थीमध्ये जम्मा ४४ जनामात्रै उत्तीर्ण भएका हुन । ९१.४५ प्रतिशत अर्थात् ४७१ जना विद्यार्थी परीक्षामा असफल भएका छन् । कक्षा ११ को पठनपाठन हुने विद्यालयका नतिजासमेत सन्तोषजनक छैन । एउटा विद्यालय त निल नै भएको छ । वडा नम्बर ७ स्थित श्री राष्ट्रिय माध्यमिक विद्यालयबाट परीक्षा दिएका एक जना पनि विद्यार्थी उत्तीर्ण हुन नसकेका हुन् ।
पालिकामा कक्षा १२ सम्म पठनपाठन गराउने जनकल्याण माध्यमिक विद्यालयबाट चार, लक्ष्मी माध्यमिक विद्यालय पृथ्वीपुरबाट चार र जनता मावि गदरियाबाट पाँच जना विद्यार्थीमात्रै एसइई उत्तीर्ण भएका छन् । यसैगरी, दीपेन्द्र माध्यमिक विद्यालय हसुलिया र राष्ट्रिय मावि बिचैपुरबाट १४/१४ जना विद्यार्थी उत्तीर्ण भएका छन् । ग्रेड वृद्धि परीक्षामा पनि यस्तै नतिजा आए कक्षा ११ को पठनपाठनमा समस्या हुने कैलारी गाउँपालिकाका शिक्षा शाखा प्रमुख गणेश मिश्रले बताए । उनले नतिजा सुधार गर्न नसकेका विद्यालयहरुको कक्षा घटुवा गरिने उल्लेख गरे ।
बढी विद्यार्थी असफल भएका विषयहरुको हकमा कोचिङ कक्षाको व्यवस्था गाउँपालिकाले नै गर्न आवश्यक रहेको स्थानीय रेबन्त बोहराले जोड दिए । गाउँपालिकामा शिक्षा क्षेत्रका लागि तीन करोडसम्म बजेट रहने गरेको भन्दै उनले केही बजेट छुट्याएर कोचिङ कक्षा सञ्चालन गर्नुपर्ने औंल्याए। बोहराले अहिलेको नतिजाले कैलारीमा १२ सम्म पठनपाठन सञ्चालन गर्न समस्या हुने बताए ।
