धनगढी : सुदुरपश्चिम प्रदेशका आर्थिक मामिला मन्त्री सुरेन्द्र पालले साउन देखीनै बजेट कार्यान्वयनका काम अगाडी बढ्ने बताएका छन् । शनिबार बजेट प्रदेशसभामा प्रस्तुत गरेपछि आइतबार मन्त्रालयमै आयोजित पत्रकार सम्मेलनमा बोल्दै मन्त्री पालले बजेट कार्यान्वयनको प्रक्रिया साउनबाटै शुरु हुने बताएका हुन् । बिगतमा बजेट खर्च निकै कम हुने र जेठ असारमा मात्रै खर्च हुने परम्परा देखिएपनि अब त्यो परम्परालाई कम गर्दै लैजाने उनको भनाई थियो । बजेट कार्यान्वयनलाई महत्वका साथ हेरिने उनको भनाई छ ।

कुल ३१ अर्ब ६२ करोड ९८ लाख २८ हजार बजेट ल्याएको प्रदेश सरकारले आन्तरिक आम्दानीको लक्ष भने निकै कम लिएको छ । आम्दानीमा भने प्रदेश सरकारबाट प्राप्त हुने राजश्व निकै न्युन छ । प्रदेश सरकारले १ अर्ब ६० करोड ७० लाख १५ हजार आन्तरिक राजश्वबाट आम्दानी हुने लक्ष लिएको छ । यो कुल बजेटको ४.२६ प्रतिशत हो । सघिंय सरकारबाट बजेटको ७० प्रतिशत अनुदान उपलब्ध हुने सरकारले लक्ष राखेको छ । कुल बजेटबाट ६ अर्ब १५ करोड ८३ लाख ५८ हजार रुपयाँ बचत हुने सरकारको अनुमान छ ।

पालले ९ जिल्लामा ९ उद्योग स्थापना, ३२ निर्वाचन क्षेत्रमा एउटा सामुदायीक विद्यालयलाई नुमना बनाउने कार्य, ९ वटै जिल्लामा कृषिका प्याकेजहरु, प्रदेश मातहतका अस्पतालहरुमा बजेट बढाएको बताए । प्रदेश सरकारले सडक पुर्वाधारमा सबैभन्दा बढी बजेट बिनियोजन गरेको छ । शनिबार प्रदेशसभामा प्रस्तुत भएको बजेटमध्ये सबैभन्दा बढी पुर्वाधार बिकास तर्फ राखिएको छ । आगामी वर्ष प्रदेशमा सडक पूर्वाधारको विकास गर्न पाँच अर्ब ६८ करोड बजेट विनियोजन गरेको छ । हालसम्म सडक सुविधा नपुगेको बझाङको साइपाल, बैतडीको सिगास र दार्चुलाको अपी हिमालमा सडक सञ्जाल जोड्ने सडकलाई प्राथमिकता दिइएको बजेटमा उल्लेख गरिएको छ । सरकारले ऊर्जा र सिँचाइ क्षेत्रमा तीन अर्ब ६१ करोड बजेट विनियोजन गरेको छ । भौतिक पूर्वाधार विकास मन्त्रालयअन्तर्गत १३ अर्ब ३५ करोड बजेट छुट्याइएको छ ।

सरकारले ३१ अर्व ६२ करोड ९८ लाख २८ हजारको बजेट ल्याएको थियो । सुदूरपश्चिममा चालुतर्फ ११ अर्व ७ करोड १९ लाख ६३ हजार विनियोजन गरिएकोमा पूँजीगत तर्फ भने १६ अर्व ५३ करोड ८ लाख विनियोनज गरिएको छ । आन्तरिक राजश्व परिचालन तर्फबाट १ अर्व ६० करोड, राजश्व बाँडफाँड तर्फबाट ९ अर्व ९९ करोड, संघीय रोयल्टी बाँडफाँडबाट ४ अर्ब ४० लाख, समानीकरण अनुदान ८ अर्व ७२ करोड, ससर्त अनुदान ३ अर्व १३ करोड, संघीय समपूरक अनुदान १ अर्व ४२ करोड र विषेश अनुदानबाट ५५ करोड बजेट अनुमान गरिएको छ ।

आर्थिक मामिला मन्त्री पालले चालुआर्थिक वर्षको बिनियोजन बजेटबाट ६ अर्व १५ करोड रकम बच्चे बताउदै त्यसलाई पनि आगामी वर्षको बजेटको आम्दानी बाँधेका छन ।