कञ्चनपुर। नेकपा एमाले कञ्चनपुरको जिल्ला अधिवेशनमा सर्वसम्मत पदाधिकारी घोषणा गर्ने तयारी भएपछि विवाद भएको छ ।नवौं जिल्ला अधिवेशनमा सर्वसम्मत पदाधिकारी घोषणाको तयारी भएपछि विवाद भएको हो ।

अध्यक्ष मण्डलले सोमबार पदाधिकारीमा सर्वसम्मत घोषणा गर्ने तयारी गरेपछि सचिवमा उम्मेदवारी दिएका कर्णबहादुर चन्दले जिल्ला पार्टी कार्यालयको निर्वाचन कार्यालयमा तालाबन्दी गरेका थिए । त्यसपछि महाधिवेशन प्रतिनिधिहरूले निर्वाचन कार्यालय अगाडि धर्ना दिएका छन्।

उनीहरुले प्रतिनिधिहरुबाट नेतृत्व चयनको अधिकार नखोस्न चेतावनी दिँदै निर्वाचनको माग गरेका छन् । “निर्वाचन हुन्छ भनेर हामी चार दिनदेखि यहाँ बसेका छौं,ुमहाधिवेशन प्रतिनिधि शान्ति तामाङले भनिन्–“दुईचारजना नेता बसेर टीका लगाएको पदाधिकारी मान्य हुँदैन, निर्वाचन हुनुपर्छ ।

उनले प्रतिनिधिहरूलाई मताधिकार प्रयोग गरी नेतृत्व चयन गर्न दिनुपर्ने बताइन् । एमाले कञ्चनपुरको नयाँ नेतृत्व चयनका लागि ४ सय ६४ मतदाता रहेका छन् । अध्यक्ष केपी शर्मा ओलीले गत बिहीबार नवौँ जिल्ला अधिवेशनको उद्घाटन गरेका थिए ।

उनले सम्भव हुँदासम्म सर्वसम्मत नभए स्वच्छ निर्वाचन मार्फत नेतृत्व चयन गर्न नेता कार्याकर्ताहरूलाई निर्देशन दिएका थिए । अध्यक्ष मण्डलले चारदिनदेखि सहमतिको प्रयास गरेपनि सहमति हुन सकेको छैन । सहमतिकै लागि पटकपटक निर्वाचन प्रक्रिया लम्ब्याउन थालेपछि प्रतिनिधिहरू आक्रोशित बनेका छन् । अधिवेशनबाट ५ पदाधिकारीसहित १ सय २० सदस्यीय जिल्ला कमिटी निर्वाचित हुनेछ । त्यसमा भौगोलिक क्षेत्रबाट ५०,समावेशी ४६, खुला १९ सदस्य निर्वाचित हुने छन् ।निर्वाचनबाट ७ सदस्यीय लेखा समिति पनि निर्वाचित हुनेछ । अध्यक्षका लागि वर्तमान कार्यवाहक अध्यक्ष लक्ष्मी बुढा र नेता अशोक चन्दले उम्मेदवारी दर्ता गराएका छन् ।