धनगढी। सुदूरपश्चिमबाट काठमाडौँ कम आउजाउ गर्नेमा प्रदेशका आन्तरिक मामिला मन्त्री शिवराज भट्ट र भूमी, व्यवस्था कृषि तथा सहकारी मन्त्री रामेश्वर चौधरी परेका छन् । सुदूरपश्चिम प्रदेशका मुख्यमन्त्री र मन्त्रीले काठमाडौँ ओहोरदोहोर गरेर एकअर्कालाई पछ्याइरहेको पाइएका बेला यीसहित केही मन्त्री भने कमै मात्रामा आउजाउ गरेको पाइएको छ।
मुख्यमन्त्री कमल शाहले २२, आर्थिक मामिला मन्त्री नरेशकुमार शाहीले २१ र भौतिक पूर्वाधार विकास मन्त्री प्रकाशबहादुर देउवाले १५ पटक काठमाडौँ आउजाउ गरेर लाखौँ खर्च गरेको सार्वजजिनक भइसकेको छ। तर प्रदेशका आन्तरिक मामिला मन्त्री भट्ट भने अहिलेसम्म तीन पटक मात्र काठमाडौँ गएको पाइएको छ भने भूमी, व्यवस्था कृषि तथा सहकारी मन्त्री रामेश्वरपनि कमै मात्रामा काठमाडौँ आउजाउ गरेका छन्।
आन्तरिक मामिला मन्त्रालयले उपलब्ध गराएको विवरणअनुसार १७ साउनमा पदभार ग्रहण गरेका मन्त्री भट्ट हालसम्म तीन पटक मात्र काठमाडौँ गएका छन् । पहिलो पटक उनी ३१ साउन, दोस्रोपटक ६ मंसिर र तेस्रोपटक २० माघमा काठमाडौँ गएको मन्त्रालयको विवरणमा उल्लेख छ। तीनपटकको काठमाडौँ यात्रामा भट्टले ६२ हजार रुपैयाँ मात्र खर्च गरेका छन् तर उनको सचिवालयका कर्मचारी र सुरक्षागार्ड समेतको खर्च भने एक लाख ४८ हजार छ।
मन्त्री भट्टको सचिवालयले अतिआवश्यक काम पर्दा मात्र उनी संघीय राजधानी जाने गरेको जनाएको छ। भट्टपछि कम मात्रामा काठमाडौँ जानेमा भूमी व्यवस्था कृषि तथा सहकारी मन्त्री रामेश्वर चौधरी परेका छन्। १७ साउनमै पदभार ग्रहण गरेका चौधरी पाँचपटक मात्र काठमाडौँ गएको विवरण प्राप्त भएको छ। चौधरी पहिलोपटक १८ साउन, दोस्रोपटक २५ साउन,तेस्रोपटक १३ भदौँ,चौथोपटक २८ भदौँ र पाचौँपटक १४ मंसिरमा काठमाडौँ गएका छन्।
पाँच पटक काठमाडौँ आउजाउ गर्दा चौधरीले ९२ हजार रुपैयाँ मात्र खर्च गरेका छन् तर उनको निजी सचिवालयका कर्मचारी र सुरक्षागार्ड समेतको खर्च भने दुई लाख ७७ हजार भएको देखिएको छ। भट्टले जस्तै चौधरी पनि मन्त्रालयको अत्यावश्यक कामकाजका लागि मात्र संघीय राजधानी काठमाडौँ आउजाउ गरेको उनको सचिवालयले जनाएको छ।
