दार्चुला। दार्चुलामा एनआइसी एसिया बैंकको एटीएम फोड्न खोज्ने एक जना पक्राउ परेका छन्।
विहिबार राति जिल्लाको महाकाली नगरपालिका–४ सैनिक गेट अगाडी रहेको एनआइसी एसिया बैंकको एटीएम फुटाएर चोरी गर्न खोज्ने दार्चुला दुहुँ ४ पोक्सेका २९ वर्षीय दिलेन्द्रसिंह कार्की पक्राउ परेका हुन्। नगद चोरी गर्ने नीयतले एटीएम फुटाउन खोज्ने कार्कीलाई पक्राउ गरिएको जिल्ला प्रहरी कार्यालय दार्चुलाका प्रहरी निरीक्षक गोबिन्द भण्डारीले बताए।
कार्कीले बिहिवार राती साढे १२ बजेको समयमा एटीएम फोड्ने प्रयास गरेका थिए। तर, फोड्न सकेनन्। बिहान मात्रै बैंकका कर्मचारीले एटीएम बक्सको केही भाग फोडेको देखेपछि प्रहरीलाई खबर गरेका थिए। एटीएम कक्षको सीसीटिभी क्यामेराको फुटेजमा देखिएको हुलियाको आधारमा शुक्रवार दिउँसो साढे १२ सदरमुकाम खलंगाबाट उनलाई पक्राउ गरिएको हो। पक्राउ परेका कार्कीलाई सोधपुछ तथा थप अनुसन्धान भइरहेको प्रहरीले जनाएको छ ।
