कैलाली। कैलालीको टीकापुरस्थित सरकारी जग्गा हडपेको आरोपमा मृत्यु भइसकेका आफन्तको नाममा भ्रष्टाचारको मुद्दा दायर भएको छ। विभिन्न समयमा नगर विकास समितिको जिम्मेवारी सम्हालेका सबैलाई मुख्य प्रतिवादी बनाउँदै अख्तियार दुरुपयोग अनुसन्धान आयोगले विशेष अदालतमा मुद्दा चलाएको हो।
मृत्यु भइसकेकाहरु सहित जम्मा २४९ जनाविरुद्ध भ्रष्टाचार मुद्दा चलेको छ। टीकापुर नगर विकास समितिको जग्गा कब्जा प्रकरणमा अख्तियार दुरुपयोग अनुसन्धान आयोगले मृत्यु भइसकेका ७ जना परिवारका सदस्यलाई प्रतिवादी बनाएर भ्रष्टाचारको मुद्दा दायर गरेको हो।
टीकापुर नगरपालिका–८ मनिकापुरका सुरुका जग्गा धनी कमानसिंह रावलले सार्वजनिक जग्गा कब्जा गरेको भन्दै उनका छोरा गणेश रावललाई प्रतिवादी बनाउँदै एक लाख ५० हजार पाँच सय १३ रुपैयाँ बिगो असुल उपर गरान विशेष अदालतमा मुद्दा दायर गरिएको छ। त्यस्तै कर्णशिला शाहीले पनि सार्वजनिक जग्गा कब्जा गरेको भन्दै मुद्दा दायर भएको छ। तर उनको मृत्यु भइसकेको छ। अख्तियारले उनका छोरा दिपेन्द्रबहादुर शाहीलाई प्रतिवादी बनाउँदै एक लाख २५ हजार बिगो दाबी गर्दै मुद्दा दायर गरिएको छ।
त्यस्तै मृत्यु भइसकेका खगेन्द्रबहादुर चन्दका छोरा सागर चन्दलाई प्रतिवादी बनाउँदै बिगोदावी माग गरिएको छ। सागरको नाममा एक लाख ५९ हजार ४६७ रुपैयाँ खसुल उपर गर्न मागदाबी गरिएको छ। टीकापुर नगर विकास समितिको जग्गा घोटलामा मृत्यु भइसकेका गम्भिरे कडायतकी श्रीमती मथुरादेबी कडायतलाई प्रतिवादी बनाउँदै एक लाख २५ हजार १३७ रुपैयाँ बिगोदाबी माग गरिएको छ। त्यस्तै मृत्यु भइसकेको तारामान भण्डारीकी श्रीमती इन्द्रादेबी भण्डारीलाई प्रतिवादी बनाएर एक लाख २५ हजार असुल उपर गर्न मागदाबी गरिएको छ। त्यस्तै मृतक नरबहादुर बमका छोरा धनबहादुर बमलाई प्रतिवादी बनाउँदै ८० हजार असुल उपर गर्न अख्तियार दुरुपयोग अनुसन्धान आयोगले बिशेष अदालतमा मुद्दा दायर गरेको छ।
टीकापुर जग्गा हिनामिनामा तीन जनासँग २ करोड बढीको बिगो, अन्य कसलाई कति ? (सुचिसहित )
