कञ्चनपुर। कञ्चनपुरको महेन्द्रनगर–भासी सडकखण्डमा आज बिहान भएको सडक दुर्घटनामा एक जनाको मृत्यु भएको छ। पूर्व–पश्चिम महेन्द्र राजमार्गअन्तर्गत आज सोमबार बिहान भाषीमा सुपप्र ०२००४१ प २७०० नम्बरको स्कुटर र म२प ७४५६ नम्बरको मोटरसाइकल एकआपसमा ठोक्किँएका थिए।
जिल्ला प्रहरी कार्यालयका अनुसार स्कुटर चालक भीमदत्त नगरपालिका-९ का ४८ वर्षीय तारासिंह कार्कीको मृत्यु भएको हो। सख्त घाइते उहाँको महाकाली प्रादेशिक अस्पतालमा उपचारका क्रममा मृत्यु भएको प्रहरीले जनाएको छ। सोही स्कुटरमा सवार कार्कीका श्रीमती लक्ष्मी कार्की भने सामान्य घाइते भएको प्रहरीले जनाएको छ।
दुर्घटनापछि फरार रहेका मोटरसाइकल चालक बेदकोट नगरपालिका-१० का २२ वर्षीय शेरसिंह सार्कीलाई प्रहरीले नियन्त्रणमा लिएको छ भने सो बखत सोही दुर्घटनास्थलमा रहेको ट्र्याक्टर चालकलाई समेत सोधपुछका लागि नियन्त्रणमा लिएको जनाइएको छ। मतृकको शव परीक्षणका लागि महाकाली प्रादेशिक अस्पतालमा राखिएको र दुर्घटनाको बारेमा थप अनुसन्धान भइरहेको कञ्चनपुर प्रहरीले जनाएको छ।
