डोटी। डोटीमा बौलाहा कुकुरले टोक्दा ५ जना घाइते भएका छन्। डोटीको शिखर नगरपालिका वडा नम्बर–१ कपल्लेखीमा बौलाहा कुकुरले एकै दिन ५ जनालाई टोकेको प्रहरीले जनाएको छ । शुक्रवार बिहान २ जनालाई टोकेको सोही कुकुरले साँझ थप ३ जनालाई टोकेको हो ।
बौलाहा कुकुरको टोकाईबाट २८ वर्षीया मिना महारा, ३९ वर्षीया सीता भुल र १० वर्षीय आदेश विक घाइते भएका छन्। कुकुरले टोकेका उनीहरू पाँचै जनाको जिल्ला अस्पताल डोटीमा उपचारपछि घर पठाइएको छ। कुकुर नियन्त्रणमा नआएको वडा अध्यक्ष दीपक बोगटीले बताए।
कुकुर नियन्त्रणमा नआएको हुनाले जुनसुकै बेला अरूलाई पनि टोक्नसक्ने भएकाले वडाभरि माइकिङ गरि जानकारी दिइएको उनले बताए। कुकुर नियन्त्रणका लागि डिभिजन वन कार्यालय डोटी तथा प्रहरी लगायतका निकायसँग समन्वय भएको र भोलि सम्म नियन्त्रणमा ल्याइने अध्यक्षले बताए ।
