बैतडी। बैतडीमा जिप दुर्घटना भएको छ। बैतडीको मेलौलीबाट देहिमाण्डौतर्फ आइरेहको बा ७ च ३०५२ नम्बरको जिप सलेना–देहिमाण्डौ ग्रामिण सडकखण्डको मलौली नगरपालिका वडा नं २ को कार्यालय नजिक गेरडामा दुर्घटना भएको प्रहरीले जनाएको छ।
बुधबार दिउँसो पौने तीन बजे जिप दुर्घटना हुँदा एक जना घाइते भएका छन् । दुर्घटनामा परी जिप चालक मेलौली नगरपालिका ९ विशालपुरका ३१ बर्षीय भीमराज भट्ट घाईते भएका हुन् । उनको ढाडमा चोट लागेको जिल्ला प्रहरी कार्यालयका प्रवक्ता प्रहरी निरीक्षक योगेश खत्रीले बताए। चालक सहित तीनजना सवार रहेको जिप उकालोमा नचढेपछि दुईजना यात्रुलाई ओरोलेर जिप चलाएको बुझिएको छ । उकालोमा जिप नचढेर सडकबाट करीब २० मिटर तल खसेको प्रहरीले जनाएको छ। घटनाबारे थप अनुसन्धान भइरहेको प्रहरीले जनाएको छ।
