कञ्चनपुर। कञ्चनपुरमा पछिल्लो दुई वर्षमा सवारी दुर्घटनामा परि ६८ जनाको मृत्यु भएको छ। जिल्ला ट्राफिक प्रहरी कार्यालय कञ्चनपुरको तथ्यांक अनुसार पछिल्लो दुई वर्षमा कञ्चनपुरमा १ सय ९० सवारी दुर्घटना भएका छन्।
सो दुर्घटनामा परि ६८ जनाले ज्यान गुमाएको जिल्ला ट्राफिक प्रहरी कार्यालय कञ्चनपुरले जनाएको छ । आर्थिक वर्ष २०७७/७८ मा ९३ र आ.व. २०७८/७९ मा ९७ सडक दुर्घटना भएका थिए। चालू आव २०७९/८० को अहिलेसम्म ३३ दुर्घटना भएका छन् । सवारी दुर्घटनामा परेर आ.व. २०७७/७८ मा ३५ तथा २०७८/७९ मा ३३ जनाको मृत्यु भएको थियो। जिल्ला ट्राफिक प्रहरी कार्यालय कञ्चनपुरको तथ्याङ्कअनुसार सडक दुर्घटना बढ्दो क्रममा रहेको पाइएको छ।
कञ्चनपुरमा सडक दुर्घटना न्यूनीकरण गर्न ट्राफिक प्रहरीले सवारी साधन जाँचमा कडाइ गरेको जनाएको छ। जिल्ला ट्राफिक प्रहरी कार्यालयका प्रहरी निरीक्षक उमेश चन्दले सडक दुर्घटना बढ्दै गएपछि न्यूनीकरण गर्न सवारी साधन जाँचमा कडाइ गरिएको बताए ।पछिल्लो समय ट्राफिक नियमको पालना नगर्दा सडक दुर्घटना बढ्दो रहेकोले हामीले सडकमा चल्ने सवारी साधनको जाँचमा कडाइ गरेको उनले बताए । ट्राफिक नियम पालना गर्न लापरबाही गर्दा दुर्घटना बढिरहेको उनको भनाई छ । उनका अनुसार दैनिक चार पाँच पटक पूर्व–पश्चिम महेन्द्र राजमार्गलगायत विभिन्न सडकमा ट्राफिक जाँच गर्ने गरिएको छ।
ट्राफिक नियम उल्लङ्घन गर्नेलाई जरिवाना भराउनाका साथै सचेत गर्ने गरिएको प्रहरी निरीक्षक चन्दले बताए। ट्राफिक जाँचमा कडाइ गरेपछि राजस्व सङ्कलनमा पनि बढोत्तरी भएको छ”,उनले भने, “मादक पदार्थ सेवन, हेल्मेटविना साधन चलाउने, लाइसेन्स लगायतजाँच गर्ने गरिन्छ। ट्राफिक जाँचका क्रममा सबैभन्दा बढी मादक पदार्थ सेवन गरेर सवारी साधन चलाउने फेला पर्ने गरेका छन्। सवारी साधनको नम्बर प्लेटमा राख्ने गरिएको नेपालको झन्डा हटाउने अभियान पनि सञ्चालन गरिएको प्रहरी निरीक्षक चन्दले बताए। नम्बर प्लेटमा राख्ने गरिएको झन्डाले नम्बर सानो देखिने भयो, टाढाबाट पनि स्पष्ट देखिएन”उनले भने। त्यसैले झन्डा हटाएर प्लेटमा नम्बर मात्रै लेख्न लगाउने गरेको उनको भनाई छ।
