काठमाडौँ। निवर्तमान प्रधानमन्त्री शेरबहादुर देउवाले नवनियुक्त प्रधानमन्त्री पुष्पकमल दाहाल ‘प्रचण्ड’लाई प्रधानमन्त्रीमा नियुक्त भएकोमा बधाई दिएका छन्। नेकपा माओवादी केन्द्रका अध्यक्षसमेत रहेका प्रचण्डलाई निवर्तमान प्रधानमन्त्रीसमेत रहेका नेपाली कांग्रेसका सभापति देउवाले सोमबार टेलिफोनमार्फत् बधाई तथा सफल कार्यकालको शुभकामना दिएका हुन्।
माओवादीका एक नेताका अनुसार आज बिहान माओवादी पदाधिकारी बैठक चलिरहेका बेला फोन गरेर बधाई दिएका हुन्। माओवादी पदाधिकारी बैठकपछि प्रवक्ता कृष्णबहादुर महराले भने, ‘भर्खर शेरबहादुर देउवाले पनि बधाई अध्यक्षज्यूलाई प्रधानमन्त्री बनेकोमा बधाइ दिनुभयो। कांग्रेसका नेताहरूले फोन गरे हाम्रो प्रधानमन्त्री तपाईं नै हो भन्नुभयो।’कांग्रेस वरिष्ठ नेता रामचन्द्र पौडेल खुलेर देउवाको हठले गठबन्धन टुटेको बताइसकेको प्रवक्ता महराले बताए। कांग्रेसले प्रधानमन्त्री र राष्ट्रपति दुवै नछाड्ने अडान कसेपछि प्रचण्ड एमाले नेतृत्वको गठबन्धनमा गएर प्रधानमन्त्री बनेका थिए।
