धनगढी। धनगढीमा मेयर धनगढी प्याव्सन कप क्रिकेट प्रतियोगिता को आयोजन हुने भएको छ । स्वास्थ्यका लागि खेलकुद राष्ट्रका लागि खेलकुद भन्ने मूल नाराका साथ फागुन २७ गतेदेखि मेयर धनगढी प्याव्सन कप क्रिकेट प्रतियोगिता २०७८ हुन लागेको हो ।
आज आयोजक प्याव्सन धनगढी नगर समितिले पत्रकार सम्मेलनको आयोजना गर्दै सो बारे जानकारी दिएको हो ।विद्यालयस्तरबाटै योग्य खेलाडी उत्पादन गर्ने उद्देश्यले विगतका वर्षहरूमा प्रतियोगिताको आयोजना हुँदै आएको छ ।धनगढीमा क्रिकेटको चहलपहल बढाउने, सुदूरपश्चिमलाई खेलको माध्यमबाट देशभर चिनाउने उद्देश्यले प्रतियोगिताको आयोजना गर्न लागेको प्याव्सन धनगढीले जनाएको छ । प्रतियोगितामा धनगढी नगर क्षेत्रका २० विद्यालयको सहभागिता हुनेछन् ।
धनगढीको सङ्घीय प्रहरी इकाई कार्यालयको खेल मैदानमा हुने प्रतियोगिताको विजेताले नगद एक लाख एघार हजार एघार ट्रफी,मेडल र प्रमाणपत्र प्राप्त गर्नेछन् भने उपविजेता टीमले ५१ हजार एक सय एघार नगद ट्रफी,मेडल र प्रमाणपत्र प्राप्त गर्नेछन् । यस्तै उत्कृष्ट खेलाडीले १० हजार,उत्कृष्ट व्यास्टम्यान,बलर,उदयमान खेलाडीले जनही ५ ५ हजार र प्रत्येक खेलको म्यान अफ द म्याचले एक हजार प्राप्त गर्ने आयोजकले जनाएको छ । प्रतियोगिता टि ट्वान्टी फरम्याटमा खेलाइने जनाएको छ । प्रतियोगिताको मुख्य प्रायोजक धनगढी उपमहानगरपालिका रहेको प्रतियोगिताका संयोजक कलेन्द्र शाहीले जानकारी दिए ।
