बैतडी। बैतडीमा ८६ बर्षिय बृद्धमाथी कुटपीट भएको छ। बैतडीको पंचेश्वर गाउँपालिका – ५ बालरका ८६ बर्षिय साईचन चन्दमाथी रातिको समयमा कुटपीट भएको हो।
राती घरमा सुतेको बेला ३/४ जनाको समुहमा आएका अपरिचित व्यक्तिले बृद्धको टाउकोमा लौरोले प्रहार गरेको जनाइएको छ। बृद्धको टाउकोमा चोट लागेको छ । स्थानीय महेश चन्दले बुढाबुढी मात्रै सो घरमा बस्ने भएकाले लुटपाट गर्ने उद्देश्यले आक्रमण भएको हुनसक्ने बताए। २७ गते राती ११ बजेको समयमा ढोका ढकढक्याएको र को आयो भनेर ढोका खोल्ने बितिकै लौरोले बृद्धको टाउकोमा हानेको स्थानीय चन्दले भने ।
उनले दुवै बुढाबुढी बस्ने घर जंगलको छेउमा एकान्तमा रहेको बताए । ती बृद्ध भारतीय आर्मीबाट अवकास पाएर पेन्सन पाउने भएकाले घरमा पैसा लुट्न आक्रमणको प्रयास भएको हुनसक्ने स्थानीयले बताएका छन । बृद्ध दम्पतीका सन्तान छैनन्। दुवैजना राम्ररी आखाँ पनि नदेख्ने भएकाले उनीहरु अहिले सो घरमा त्रसित बनेर बसेको स्थानीयले बताएका छन।स्थानीयले घटनाको बारेमा स्थानीय बालारा गिरेगाडा चौकीमा खबर गरेका थिए । प्रहरीले अहिलेसम्म अपराधिको खोजी कार्य जारी रहेको जनाएपनि कसैलाई पनि पक्राउ गर्न सकेको छैन। उता जिल्ला प्रहरी कार्यालय बैतडीले भने घटनाका बारेमा जानकारी प्राप्त नभएको जनाएको छ।
