कैलाली। सुदूरपश्चिम प्रदेशमा वर्षा भइरहेको छ भने उच्च पहाडका उच्च हिमाली क्षेत्रमा हिमपात जारी रहेको छ । मौसम बदली हुँदा अहिले प्रदेशका तराईका जिल्लामा वर्षा र उच्च पहाडी क्षेत्रमा हिमपात भइरहेको हो।
पहाडी जिल्लामा बाक्लो हिमपात सुरु भएको छ। मौसममा आएको परिवर्तनसँगै आज बिहीबार अपरान्हदेखि उच्च लेकाली क्षेत्रमा हिमपात भएको हो। कैलाली र कञ्चनपुरमा दिउँसोदेखि वर्षा भइरहेको छ । माघ महिनायता राम्ररी घाम नलागेको यस क्षेत्रमा वर्षा भएपछि चिसो झन् बढेको छ । चिसोका कारण यस क्षेत्रको जनजीवन नराम्ररी प्रभावित बनेको छ।
प्रदेशका डडेल्धुरा, बैतडी, बझाङका र डोटीका पहाडी क्षेत्रमा हिमपात भइरहेको स्थानीयले बताएका छन्। डडेल्धुराको साहुखर्क, हगुल्टे लेक, बैतडीको खोड्पे, बझाङको देउलेक क्षेत्रमा भारी हिमपात भइरहेको छ । चिसो बढेकाले सुरक्षा सतर्कता अपनाउन मौसमविद्ले आग्रह गरेका छन् ।
