काठमाडौं। नेकपा एमालेका सचिव योगेश भट्टराईले भीम रावललाई उपयुक्त विकल्प दिन सकेमा केपी ओली सर्वसम्मत अध्यक्ष हुन सक्ने बताएका छन् । पत्रकारसँग कुरा गर्दै नेता भट्टराईले भने, “रावलको उम्मेदवारीलाई लोकतान्त्रिक अभ्यासका रुपमा लिनुपर्छ।

पार्टी नेतृत्वले फराकिलो दृष्टिकोणका साथ कमरेड भीम रावलका निम्ति उपयुक्त विकल्प दिन सक्दा केपी ओली सर्वसम्मत अध्यक्ष बन्ने वातावरण बन्न सक्छ । म शतप्रतिशत ग्यारेन्टी त गर्न सक्दिनँ। यो नेतृत्वको पहल र आकांक्षीको समझदारीमा भर पर्छ ।”
एमालेलाई अध्यक्ष र महासचिव मात्र राखेर पनि अघि बढाउन सकिने भट्टराईले बताए। उनले भने, “एमालेले आठौं महाधिवेशनपछि मात्र बहुपदको व्यवस्था गरेको हो।

पहिले महासचिव मात्र हुन्थे, अरु सबै सदस्य हुन्थे । त्यसैले पद गौण हो । पद आवश्यकताले सिर्जना हुन्छ । संविधान त संशोधन हुन्छ, नयाँ बन्छ भने विधान संशोधन हुन नसक्ने कुरा होइन । अध्यक्ष र महासचिव मात्र राखेर पनि अघि बढ्न सकिन्छ ।”दसौं महाधिवेशनमा फेरि पनि सचिव पदमा उम्मेदवारी दिने उनले बताए । उनले थपे, “पाँच वर्षको तालिमले मलाई पुगेन । म सचिवमै अघि बढ्छु । मलाई अझै तालिमको खाँचो छ । अर्को पाँच वर्षमा परिपक्व भएपछि अलिकति माथि जान्छु ।”

आन्तरिक र बाह्य कारणले पार्टी प्रतिपक्षमा रहे पनि फेरि कमब्याक गर्ने दाबी उनले गरे । भट्टराईले भने, “संसदीय गणितको प्रभाव जनतामा अन्यन्त न्यून छ । केही साथीहरु बाहिरिए पनि माओवादी पार्टीका मानिसबाट क्षतिपूर्ति हुन्छ । एमाले यो महाधिवेशनको उत्साहबाट कम ब्याक हुन्छ । एमालेलाई विभाजित गर्न खोजे पनि एकताबद्ध छ र ताजा जनादेशबाट सत्तामा फर्कन्छ भन्ने सन्देश ८ लाख ५० हजार पार्टी सदस्यलाई दिनेछौं ।”