धनगढी। चाडपर्व लगत्तै रोजगारीका लागी भारत जाने बढेका छन् । दशै तिहार मनाउन स्वदेश फर्किएका सुदुरपश्चिमेलीहरु पुनः कामको सिलसिलामा भारत जान थालेका हुन् ।
चाडपर्व मनाउन केही दिनको बिदामा घर आएका सुदुरपश्चिमेलीहरु निधारको रातो टिका नपुछिदै पुनः भारत जान बाध्य भएका हुन् । हिउँदेबाली लगाउने समय र घरमा कामको चटारोलाई थाँती राख्दै युवा, बयस्क देखी बृद्ध उमेर समुहका उनीहरु काम गर्न भारत जान थालेपछि गाउँघर सुनसान बन्न थालेका छन् ।
अहिले दैनिक जसो उनीहरु रोजगारीका लागी भारतका बिभिन्न सहरहरुमा काम गर्न सिमानाका गौरीफन्टामा जम्मा भएका देखीन्छन् । सुदुरपश्चिमका पहाडी जिल्ला देखी काँधमा झोला बोक्दै निधारमा रातो टिका नपुछिदै सिमानाकामा लाईनमा उभिएका देखीन्छन् । दशै तिहारका लागी घर आएका कञ्चनपुर बुटाबारीका जगत बिक र करन बुढाले कामकै लागी भारत जान लागेको बताए । अब काम पाइने नपाईने भारतमै गएर थाहा हुने उनले बताए ।
भारतमा काम गर्दै आएकोले त्यहाँबाट साहुले छिटो भन्दा छिटो आउन भनेको नत्र अर्को मान्छे राख्ने दवाब दिएकाले छिट्टै जान परेको उनको भनाई छ । कामको खोजीमा तिन चार सय देखी छ सात सय जना भारत गइरहेका छन् । बेरोजगारका कारण बर्षेनी काम खोज्न भारत जानुपर्ने बाध्यता र यस बर्ष बेमौसमी बर्षाका कारण धानबालीमा क्षती गरेपछि खान लाउन नपुग्ने भएपछि छिट्टै भारत गइरहेको उनीहरुले बताएका छन् । तिहार भन्दा एक दुई दिन अघि आएका कञ्चनपुरका भिम बहादुर रावलले आफु सहित ५ जना भारतमा काम गर्न जान लागेको बताए । कैलालीको लम्की चुहा ४ का प्रेम बजगाईँले देशमा बेरोजगारीको समस्या कायमै रहेकाले पुनः भारतमा जान लागेको बताए ।
यस्तै धनगढी शिवनगरका चक्र रोकाया पनी पिठ्यूमा झाला बोक्दै सिमानाकामा लाईनमै रहेका छन् । उनले काम नभएर भारतमा जान लागेको भने । उनले घरमा खान लाउन पैसाको समस्या र घरपरिवार पाल्नकै लागी नौकरी खोज्न गइरहेको बताए । सरकारले रोजगार दिएपनी आफन्तलाई लगाउने, पहुँचबालाले मात्रै काम पाउने र हामी जस्ता बास्तबिक बेरोजगार काम नपाएको उनले गुनासो गरे । प्रत्येक बर्ष बेरोजगारका कारण हजारौँसुदुरपश्चिमेलीहरु रोजगारकै खोजीमा भारत जान थालेका छन् । तिन तहकै सरकारले रोजगारका बिभिन्न कार्यक्रम ल्याएको घोषणा गरेपनी ५ बर्ष पुग्नै लाग्दा पनी अझै बेरोजगारहरुले रोजगार नै पाउन सकेका छन् । तसर्थ यस तर्फ तिन तहकै सरकारको ध्यान कहिले जाने ?
