बैतडी।बैतडीमा वडा सदस्यले चलाएको मोटरसाइकलबाट खसेर एक महिलाको मृत्यु भएको छ। बैतडीको पञ्चेश्वर गाउँपालिका ३ कुलाउबाट सोही गाउँपालिकाको आम्चोरा जाने क्रममा आइतबार दिउँसो मोटरसाइकलबाट खसेर पञ्चेश्वर ३ गोगनपानीका ५० बर्षीय लक्ष्मी साउँदको मृत्यु भएको हो ।
पञ्चेश्वर गाउँपालिका वडा नं १ का वडा सदस्य परमल घटालले चलाईरहेको सु.प.प्र.०१००३ प २६६१ नम्बरको मोटरसाइकलको पछाडी बसेका साउँद खसेर गम्भीर घाइते भएकी थिइन्। उनलाई उपचारका लागि केशरपुर प्राथमिक स्वास्थ्य केन्द्र मेलौली ल्याउँदै गर्दा बाटोमै मृत्यु भएको जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले जानकारी दिए। कच्ची सडकका कारण दुर्घटना भएको अनुमान गरिएपनि यकिन कारण भने खुल्न नसकेको प्रहरीले जनाएको छ। घटनाका बिषयमा थप अनुसन्धान भैरहेको जनाइएको छ ।
