धनगढी। पहिरोका कारण जयपृथ्वी राजमार्ग ठाउँ ठाउँमा अवरुद्ध बनेको छ । पहिरोले बैतडी र बझाङमा राजमार्ग अवरुद्ध भएको प्रहरीले जनाएको छ ।
जिल्ला प्रहरी कार्यालयका अनुसार पाटन नगरपालिका–८ खोड्पे नजिकै र पुर्चौडी नगरपालिका–६ ढोल्यामोडमा आएको पहिरोले सडक अवरुद्ध भएको प्रहरीले जनाएको छ । यस्तै बझाङको दुर्गाथली गाउँपालिका–२ झनाना नजिकै आएको पहिरोले राजमार्ग अवरुद्ध भएको जिल्ला प्रहरी कार्यालयका प्रमुख प्रहरी नायब उपरीक्षक(डीएसपी) रुपक खड्काले जानकारी दिए ।
यस्तै, सुदुरपश्चिमका ७ पहाडी जिल्ला जोड्ने भीमदत्त राजमार्ग अवरुद्ध भएको छ। बिहीबारको वर्षाले भीमदत्त राजमार्गस्थित डडेल्धुराको आलिताल गाउँपालिका -१ मा पहिरो जाँदा राजमार्ग अवरुद्ध बनेको हो। राजमार्गको ठाउँठाउँमा पहिरो गएको र यात्रु तथा सवारीसाधन अलपत्र परेका गाङ्खेत प्रहरी चौकीले जनाएको छ। गन्तव्यका लागि छुटेका सवारीसाधन बीच बाटोमै रोकिएका छन् । डोजरको सहायताले सडक खुलाउने प्रयास भइरहेको छ ।
