बैतडी। बैतडीको पाटन नगरपालिकामा बालविकास र विद्यालय कर्मचारीले तालाबन्दी गरेका छन् । बालविकास सहकर्ता र विद्यालय कर्मचारीहरुले नगरपालिकामा तालाबन्दी गरेका हुन् ।
तलब वृद्धिको माग राख्दै उनीहरुले नगरपालिकामा तालाबन्दी गरेको जनाइएको छ। संघीय सरकारले बजेट भाषणको बेला बालविकास सहजकर्ता र विद्यालय कर्मचारीको न्यूनतम तलब १५ हजार हुनुपर्ने र त्यसमा ७ हजार स्थानीय सरकारले थप गर्ने भनिएपनी पाटन नगरपालिकाले त्यो कार्यान्वय नगरेकाले आफूहरु आन्दोलित भएको बालविकास सहजकर्ता अनिता महराले जानकारी दिइन्।
उनले भनिन् ‘शुरुमा बालविकास सहजकर्ता र विद्यालय कर्मचारीको तलबमा वृद्धि गरेको भएपनि पछि काटिएको छ । हाम्रो माग पूरा नहुँदा सम्म तालाबन्दी जारी रहनेछ ।’संघीय सरकारले स्थानीय श्रोतबाट तलब थपेर खुवाउनुपर्ने परिपत्र गरेकाले बालविकास सहजकर्ता र विद्यालय कर्मचारीको तलब बढाउन अप्ठ्यारो परेको नगरपालिकाले जनाएको छ ।
बालविकास सहजकर्ता र विद्यालय कर्मचारीहरुले राखेका मागप्रति आफूहरु सकारात्मक रहेको भएपनि बजेट अभावका कारण समस्या भएको नगर उपप्रमुख सरस्वती कोलीले भनीन्। अहिले नगर प्रमुख जिल्ला बाहिर रहेकाले नगरप्रमुख आउने बित्तिकै बालविकास सहजकर्ता र विद्यालय कर्मचारीको तलबका बिषयमा छलफल गरिने उपप्रमुख कोलीले बताइन् । तर बालविकास सहजकर्ता र विद्यालय कर्मचारीहरुले आफूहरुका माग पूरा नहुँदा सम्म तालाबन्दी जारी रहने भनेका छन्।
