धनगढी । सुदूरपश्चिम प्रदेशका लागि १७ लाख १६ हजार थान किताब धनगढी आएको छ। जनक शिक्षा सामाग्री केन्द्रले शैक्षिक सत्र २०८२ का लागि आवश्यक किताब धनगढी पठाएको हो।
सुदूरपश्चिम प्रदेशका नौ वटा जिल्लाका सामुदायिक विद्यालयका विद्यार्थीहरूका लागि १८ लाख १७ हजार थान किताब आवश्यक पर्ने अनुमान गरिएको छ। शनिवारसम्म १७ लाख १६ हजार थान किताब धनगढी पुगेको छ। जनक शिक्षा सामाग्री केन्द्रले शनिवार मात्र थप २ वटा गाडी छापाखानाबाट धनगढीका लागि पठाएको छ। काठमाडौँबाट हिँडेको गाडी धनगढी पुगेपछि माग अनुसारको किताब ढुवानीको काम पूरा हुने जनक शिक्षा सामाग्री केन्द्र, प्रादेशिक कार्यालय, धनगढीले बताएको छ।
जनक शिक्षा सामाग्री केन्द्र, धनगढीले किताब बिक्री–वितरणको कामसमेत गर्दै छ। छापाखानाबाट धनगढी आएका किताबहरूलाई चैत १७ गतेबाट पहाडी जिल्लामा पठाउन थालिएको हो। जनक शिक्षा सामाग्री केन्द्र, धनगढीका प्रमुख रामविनय श्रेष्ठले बाजुरा जिल्लाबाट किताब वितरणको काम सुरु गरेको बताएका छन्। उनले बाजुरा, दार्चुला, बझाङ र बैतडी जिल्लामा किताब पठाइएको बताए। जनक शिक्षा सामाग्री केन्द्र, धनगढीले बाजुराका लागि एक लाख नौ हजार २ सय ९६ थान, दार्चुलाका लागि ९५ हजार चार सय ६ थान, बझाङका लागि ७२ हजार पाँच सय ५० थान र बैतडीका लागि एक लाख एक हजार सात सय ७३ थान किताब पठाएको छ। जनक शिक्षा सामाग्री केन्द्र, धनगढीले शुक्रवारसम्म तीन लाख ७९ हजार २५ थान किताब पहाडी चार जिल्लाका लागि पठाएको हो। डोटी र अछामका लागि शनिवार किताब पठाइएको छ।
सुदूरपश्चिम प्रदेशमा सूचीकृत भएका एक सय ९४ व्यापारीहरू मार्फत जनक शिक्षाले किताब बिक्री–वितरण थालेको हो। सुदूरपश्चिम प्रदेशमा नयाँ शैक्षिक सत्र २०८२ का लागि चैत २९ गतेसम्म जिल्लाहरूमा किताब पुर्याउने लक्ष्य जनक शिक्षा सामाग्रीको छ। तर, स्थानीय तहहरु तथा विद्यालयहरूले किताबको माग नगरेकाले व्यापारीहरूलाई भने समस्या भएको छ। विद्यालयको माग अनुसार व्यापारीहरुले जनक शिक्षाबाट किताब लिने गरेका छन्। विद्यार्थीको सङ्ख्या नआएकाले व्यापारीहरूले बिताब ढुवानीमा सुमेत समय लगाउदैछन्। नयाँ शैक्षिक सत्रका लागि कक्षा ९ का अर्थशास्त्र, एक्षिक गणित र कम्प्युटर विषय मात्र परिवर्तन भएका छन्।
