धनगढी: राष्ट्रिय अपांग महासंघ नेपाल सुदूरपश्चिम प्रदेशले अपांगता भएका व्यक्तिहरुको ३३ औँ अन्तराष्ट्रिय दिवसको अवसर पारेर साप्ताहव्यापी कार्यक्रम आयोजना गर्ने भएको छ । शुक्रबार धनगढीमा पत्रकार सम्मेलन गर्दै महासंघले ३ डिसेम्बरमा मनाइने ३३ औँ अन्तराष्ट्रिय दिवसको अवसरमा शुक्रबारदेखि नै साप्ताहव्यापी कार्यक्रम आयोजना गरिएको जनाएको छ ।
२० मंसिरसम्म सञ्चालन हुने कार्यक्रम अन्तरगत विभिन्न खालका गतिविधी आयोजना गरिने महासंघका सुदूरपश्चिम अध्यक्ष मानबहादुर साउदले बताए । उनकाअनुसार पहिलो दिन पत्रकार सम्मेलन, १३,१४ र १५ गते ओठ तथा तालु फुटेकाहरुको निःशुल्क शल्यक्रिया शिविरको प्रचारप्रसार, लालझाडीमा अपांगता पहिचान शिविर सञ्चालन, १५ गते धनगढीमा सफसफाई कार्यक्रम, लालझाडीमा अन्तरक्रिया, १६ र १९ मंसिरमा कक्षा ९ देखि १५ सम्मको हाजिरीजवाफ प्रतियोगिता आयोजना गरिएको छ ।
मंसिर १८, १९ र २० गते धनगढीमा प्रर्दशनी मिनी महोत्सवको आयोजना गरिएको छ । महोत्सवमा सुदूरपश्चिमको कला, संस्कृति प्रवद्र्धन गर्न सांस्कृतिक कार्यक्रम गरिने आयोजकले जनाएको छ ।
