बैतडी : बैतडीमा जीप दुर्घटना हुँदा चारजना घाइते भएका छन्। धनगढीबाट रिगातर्फ आउँदै गरेको म १ ज १८६ नम्बरको बोलेरो जीप मंगलबार बेलुकी साढे ८ बजेतिर मुस्याखान शंकरपुर भित्री सडकको सुर्नया गाउँपालिका ६ खर्काधारमा दुर्घटनामा परेको हो। सुर्नया गाउँपालिका ३ का ३३ वर्षीय विरसिंह महरा, सुर्नया ६ का २० वर्षीय वसन्त कुँवर, सुर्नया ४ का २० वर्षीय नवीन सिंह महरा र २८ वर्षीय मानसिंह महरा घाइते भएका हुन्।
घाइतेमध्ये वीरसिंह र वसन्तलाई उपचारको लागि डडेल्धुरा ‘रेफर’ गरेको बैतडीका प्रहरी प्रवक्ता, प्रहरी निरीक्षक जनकराज ढुंगानाले जानकारी दिए। अन्य घाइते दुईजनाको स्थानीय मेडिकलमा उपचार भएको छ। रोकिराखेको जीप आफैँ चल्दा दुर्घटना भएको प्रहरीले जनाएको छ। दुर्घटनाग्रस्त जीप सडकबाट ६० मिटर तल खसेको छ। जीपचालक २२ वर्षीय प्रकाश कुँवरलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय बैतडीले जनाएको छ।
