धनगढी । नागरिक उन्मुक्ति पार्टीका अध्यक्ष रञ्जिता श्रेष्ठले सुदूरपश्चिममा केन्द्रीय गठवन्धनअनुसार सरकार चलिरहेको र संङ्घीय सरकारमा पनि पार्टी छिट्टै सहभागी हुने बताइन् ।
सोमबार गृहनगर टीकापुर पुग्नु भएकी अध्यक्ष श्रेष्ठले पत्रकारसँग कुरा गर्नुहुँदै नागरिक उन्मुक्ति पार्टीबाट विजयी सुदूरपश्चिम प्रदेश सभाका पाँच जना प्रदेश सभा सदस्य प्रतिपक्षको लाइनमा धेरै दिन बस्नु नहुने बताइन् ।
‘केन्द्रमा जुन गठबन्धन छ, त्यसैअनुसार जानुपर्छ भन्ने पार्टीको प्रष्ट निर्देशन छ, सुदूरपश्चिम प्रदेशमा केन्द्रीय गठबन्धन अनुसारकै सरकार चलेको छ, हाम्रा मन्त्रीहरु हुनुहुन्छ’ पार्टी अध्यक्ष श्रेष्ठले भन्नुभयो, ‘केही जना प्रदेश सभा सदस्यको पनि केही अधिकार हुन्छ प्रयोग गछौं भन्ने ठानेर बसिरहनु भएको छ, यो विषयमा छलफल भइरहेको छ, यो अवस्था धेरै दिन रहँदैन उहाँहरु पनि सत्ता पक्षमै हुनुहुन्छ ।’
सत्ता गठबन्धनमा भए पनि नागरिक उन्मुक्ति पार्टी सङ्घमा सरकार बाहिर छ । नागरिक उन्मुक्ति पार्टीको मुख्य एजेण्डा राजबन्दी रिहा गर्नु थियो, त्यो भैसकेपछि हामी सरकारमा जानुपर्छ भन्नेमा प्रष्ट छौं पूर्वमन्त्री समेत रहनु भएकी श्रेष्ठले भन्न्ुभयो, ‘अघिल्लो सरकारमा थियौं गठबन्धन फेरिए पनि हामी निरन्तर सरकार पक्षमै छौं । पार्टीका साथीहरुबिचमा कुरा नमिलेर सरकार गठन हुने बेला छुटेका हौं ।’
श्रेष्ठका अनुसार नागरिक उन्मुक्ति पार्टी सरकारमा जाँदा एक जना मन्त्री र एक जना राज्यमन्त्री हुने सहमति भइसकेको छ । प्रधानमन्त्रीको विदेश भ्रमण, बजेट लगायतका कार्यक्रमले ढिलो भयो अहिले राष्ट्रपति विदेश भ्रमणमा रहनुभएकाले ढिलो भएको छ । राष्ट्रपति स्वदेश फर्किनु भएपछि सरकारमा सामेल हुने श्रेष्ठको भनाई छ ।
