धनगढी । कैलालीको गौरीगंगा साझेदारी वन उपभोक्ता समुहमा विवाद सिर्जना भएको छ । नियमित काम गरिरहेको समितिलाई एकाएक विघटन गरी अर्को समिति बनाएर काम थालिएपछि विवाद सिर्जना भएको छ ।

गत वर्ष माघ २० गते डिभिजन वन कार्यालय कैलालीको उपस्थितमा अर्जुनप्रसाद सापकोटाको अध्यक्षतामा समिति निर्वाचित भएको थियो । उक्त निर्वाचित समितिले नियमित काम गरिरहेकै अवस्थाका डिभिजन वन कार्यलय कैलालीले बलबहादुर महतालाई अवैधानिक तरिकाले अध्यक्ष बनाएको गत वर्ष माघ २० गते निर्वाचित अध्यक्ष अर्जुनप्रसाद सापकोटाको आरोप छ ।
सापकोटाले भने,“ आफुलाई ४ वर्षे कार्यकालका लागि डिभिजन वन कार्यलय कैलालीले खटाएका प्रतिनिधिकै उपस्थितमा निर्वाचित गरियो , बैक खातामा हस्ताक्षर परिर्वतन समेत गरियो , संरक्षणको पाटोलाई अगाडि बढाईरहेका बेला फेरी डिभिजन वन कार्यलय कैलालीकै रोहबरमा केही महिना भित्रै अर्को समिति खडा गरियो, म माथि अन्याय भयो न्यायको लागि सरकारी निकायमा धाईरहेको छु ।”

उनले भने,“वनमा संकलनको तयारी गरिन् लागेको एकलाख ३१ हजार क्युबफिट काठ छ यसैको लागि बन कार्यालय कैलाली र केही काँठ व्यवसायीले अवैध चलखेल बढाएका छन् ।” डिभिजन वन कार्यालय कैलालीले निर्णय सच्याउन पहल नगरे अदालती प्रक्रियामा जाने सापकोटाको भनाई छ ।

यता कैलाली डिभिजन वन कार्यालय कैलालीका प्रमुख रामचन्द्र कँडेलले उक्त वनमा बिवाद भएको बताएका छन् । कँडेलले भने ,वनमा ब्यापक मात्रमा काठ रहेको छ , त्यसको व्यवस्थापन जरुरी छ । उपभोक्ताहरूमा सहमतिको आवश्यकता छ । उक्त वनमा आफू आउनुभन्दा पहिलेको विवाद रहेकोले अध्ययन गरिरहेको अधिकृत कँडेलको भनाई छ ।