धनगढी। सुशील कोइराला मेमोरियल अन्डर–१९ राष्ट्रिय टी–ट्वान्टी क्रिकेट प्रतियोगिताको उपाधि सुदूरपश्चिम प्रदेशले जितेको छ । कोहलपुर नगरपालिकाले आयोजना गरेको प्रतियोगिताको फाइनलमा सुदूरपश्चिमले कोहलपुर मेयर–११ लाई २ विकेटले पराजित ग¥यो ।

कोहलपुर क्रिकेट रंगशालामा सम्पन्न फाइनलमा कोहलपुर मेयर–११ ले दिएको १०३ रनको लक्ष्य सुदूरपश्चिमले ८ विकेट गुमाएर अन्तिम बलमा भेटायो । अन्तिम बलमा १ रन आवश्यक हुँदा हिसिला खड्काले चौका प्रहार गर्दै सुदूरपश्चिमलाई जिताइन् । सुदूरपश्चिमको लागि ओपनर मनिषा बोहराले सर्वाधिक ४१ रन बनाइन् । प्लेयर अफ द म्याच घोषित बोहराले ४१ बलमा ५ चौका प्रहार गरिन् ।

कप्तान स्नेहा महराले १६ रन, निलम पाण्डेले ९ रन, रबिना साउद र अनु कडायतले समान ८ रन तथा हिसिला खड्काले अविजित ६ रन बनाए ।यसअघि टस जितेर ब्याटिंग गरेको कोहलपुर मेयर–११ ले निर्धारित २० ओभरमा ५ विकेट गुमाएर १०२ रन बनायो ।कोहलपुरको लागि कप्तान सना प्रविनले सर्वाधिक ४१ रन योगदान दिइन् । ओपनिंग ब्याटिङ गरेर अविजित रहँदै प्रविनले ५४ बलमा ३ चौका मद्दतले ४१ रन बनाएकी थिइन् । रिया शर्माले अविजित १४ तथा तृष्णा विश्वकर्माले १२ रन बनाए ।

सुदूरपश्चिमको बलिङमा अनु कडायत र स्नेहा महराले २-२ विकेट लिए । अनुले ४ ओभरमा २८ रन तथा स्नेहाले ४ ओभरमा १ मेडन गर्दै ८ रन खर्चिन् ।उपाधि सहित सुदूरपश्चिम प्रदेशले एक लाख रुपैयाँ हात पा¥यो । उपविजेता कोहलपुर मेयर–११ ले पचास हजार रुपैयाँ पायो । प्रतियोगिताकै उत्कृष्ट खेलाडी कोहलपुर मेयर–११ कि कप्तान सना प्रविन भइन् र उनले १५ हजार रुपैयाँ हात पारिन् ।उत्कृष्ट बलर गण्डकी प्रदेशकी रचना चौधरी तथा उत्कृष्ट ब्याटर कोहलपुर मेयर–११ कि सना प्रविन घोषित भए । उनीहरुले समान ५ हजार रुपैयाँ प्राप्त गरे । उदयमान प्रतिभा सुदूरपश्चिम प्रदेशकी सावित्री धामी घोषित भइन् ।